Vaishnavi Hagawane Case : निलेश चव्हाणची आता सुटका नाही; मुसक्या आवळण्यासाठी पोलिसांचं मोठं पाऊल

Pune News : वैष्णवी हगवणे मृत्यू प्रकरणातील संशयित निलेश चव्हाण फरार झाला आहे. पिंपरी चिंचवड पोलिसांनी त्याच्या शोधासाठी हालचालींना वेग दिला आहे. त्याला शोधण्यासाठी विविध टीम देखील तयार करण्यात आल्या आहेत. तरी देखील अद्याप निलेश चव्हाण हा पोलिसांच्या हाती लागलेला नाही. चव्हाण परदेशात पळून जाण्याची देखील शक्यता पोलिसांना वाटत आहे.

पिंपरी चिंचवड पोलिसांनी या प्रकरणातील गांभीर्य लक्षात घेता निलेश चव्हाणच्या शोधासाठी विशेष आठ पथकांची स्थापना केली आहे. ही पथके पुणे, मुंबई, कोकण, कर्नाटक व गोवा परिसरात चौकशी करत असून, त्याचे मित्र, नातेवाईक व परिचितांकडूनही माहिती घेत आहेत. मात्र अद्याप तरी निलेश चव्हाणचा ठावठिकाणा पोलिसांना लागलेला नाही.

निलेश चव्हाणच्या आर्थिक व्यवहारांची सखोल चौकशी सुरू असून, त्याचे मोबाईल लोकेशन, बँक व्यवहार व सीसीटीव्ही फूटेजच्या आधारे त्याच्या हालचालींचा मागोवा घेतला जात आहे. ता. 16 मे रोजी वैष्णवी हगवणे हिने आपल्या राहत्या घरी गळफास लावून आत्महत्या केली होती. मात्र तिचा मृत्यू संशयास्पद असल्याने तपास सुरू झाला असून, या प्रकरणांमध्ये वैष्णवी हगावणे यांच्या सासरच्या लोकांना अटक करण्यात आली आहे.

सासरच्या लोकांना अटक करण्यात आल्यानंतर वैष्णवी हिचे नऊ महिन्याचे मूल आणण्यासाठी माहेरची मंडळी गेले असता निलेश चव्हाण याने त्यांना बंदुकीचा धाक दाखवत धमकावले असल्याचे समोर आले आहे. तसेच वैष्णवी यांच्या कौटुंबिक वादामध्ये देखील निलेश याचा सहभाग असल्याचं तपासात समोर आले असल्याचे सांगितले जात आहे. निलेशने त्याच्या पत्नीसोबत केलेल्या छळाबाबत देखील काही त्याचे कारनामे समोर आले आहेत.

या सगळ्या प्रकरणांमध्ये पोलिस त्याचा शोध घेत आहेत. मात्र अद्याप तरी निलेश चव्हाण पोलिसांच्या हाती लागलेला नाही. निलेश चव्हाण परदेशात पळून जाण्याची शक्यता लक्षात घेत पिंपरी चिंचवड पोलिसांनी लूक आउट नोटीस देखील जारी केली आहेत.

लुक आऊट नोटीस म्हणजे काय?

लुक आऊट नोटीस (LOC) ही तपास यंत्रणेकडून जारी केली जाते. यामध्ये विमानतळ व बंदर प्राधिकरणांना संशयित व्यक्ती देश सोडू नये म्हणून सतर्क राहण्याचे आदेश दिले जातात. निलेश चव्हाण पळून जाण्याचा प्रयत्न करू शकतो, असा संशय व्यक्त करून ही नोटीस काढण्यात आली आहे.