Pune Lok Sabha Election 2024: वसंत मोरे 'वंचित'चे उमेदवार, पुण्यात मोहोळ- धंगेकर- तात्यांमध्ये होणार तिरंगी लढत

Pune Lok Sabha Election: पुणे लोकसभा (Pune Lok Sabha) मतदारसंघाची निवडणूक लढविण्यासाठी इच्छूक असलेल्या वसंत मोरेंना वंचित बहुजन आघाडीकडून उमेदवारी जाहीर करण्यात आली आहे. वसंत मोरेंना (vasant More) उमेदवारी दिल्यामुळे पुणे मतदारसंघात नवा ट्विस्ट आला असून आता पुण्याची निवडणूक तिरंगी होणार आहे.

काही दिवसांपूर्वी मनसेला (MNS) अखेरचा 'जय महाराष्ट्र' केलेल्या वसंत मोरेंनी (Vasant More) अनेक पक्षांच्या वरिष्ठांच्या गाठीभेटी घेतल्या होत्या, यावेळी त्यांनी वंचितचे अध्यक्ष प्रकाश आंबेडकर (Prakash Ambedkar) यांची भेट घेतली होती. तेव्हापासून मोरे यांना वंचितकडून उमेदवारी दिली जाऊ शकते अशा चर्चा सुरु होत्या. या चर्चांवर अखेर शिक्कामोर्तब झालं आहे. (Prakash Ambedkar Announced Candidacy Vasant More)

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मनसे सोडल्यापासून महाविकास आघाडीच्या कोट्यातून वसंत मोरेंना पुणे लोकसभेची जागा मिळू शकते, अशा चर्चा सुरु झाल्या होत्या. परंतु पुणे लोकसभा मतदारसंघ काँग्रेसकडे असल्यामुळे त्यांनी विद्यमान आमदार रवींद्र धंगेकर (Ravindra Dhangekar) यांची उमेदवारी जाहीर केली. धंगेकरांच्या उमेदवारीमुळे मोरेंना आघाडीतून उमेदवारी मिळणार नसल्याचं स्पष्ट झालं होतं. तर मोरे यांनी उमेदवारीसाठी शिवसेना (Shivsena) ठाकरे गटाचे नेते संजय राऊतांपासून शरद पवारांची (Sharad pawar) भेट घेतली होती. तसेच त्यांनी वंचितचे अध्यक्ष प्रकाश आंबेडकरांचीही भेट घेतली होती.

नव्या राजकारणाची सुरुवात

वसंत मोरे यांच्या भेटीनंतर प्रकाश आंबेडकरांनी सूचक वक्तव्य केलं होतं. वसंत मोरे यांच्याबरोबर आमची चर्चा झाली. महाराष्ट्रात नव्या राजकारणाची सुरुवात कशी होईल, ती कोण कोण करणार आहे. हे अधिकृतरित्या काही दिवसांतच सर्वांसमोर मांडू. काही चर्चा आताच जाहीर करू शकत नाही. असं आंबेडकर म्हणाले होते. त्यानुसार आज आंबेडकरांनी मोरे यांना उमेदवारी जाहीर करुन नव्या राजकारणाची सुरुवात केल्याचं बोललं जात आहे.

मोहोळ-धंगेकर-तात्यांमध्ये होणार तिरंगी लढत

पुणे लोकसभा मतदारसंघासाठी महायुतीने भाजपच्या मुरलीधर मोहोळ (Muralidhar Mohol) यांना उमेदवारी जाहीर केली. तर महाविकास आघाडीकडून काँग्रेसच्या रवींद्र धंगेकरांना उमेदवारी देण्यात आली आहे. त्यामुळे जवळपास या दोन्ही उमेदवारांमध्ये थेट लढत होणार असं वाटत होतं. मात्र, आता वंचितकडून वसंत मोरेंना उमेदवारी जाहीरे केल्यामुळे पुण्यात तिरंगी लढत होणार असल्याचं निश्चित झालं आहे.

(Edited By Jagdish Patil)