Vikas Lawande Arrested : शरद पवारांच्या राष्ट्रवादीचे प्रवक्ते विकास लवांडे पोलिसांच्या ताब्यात, 'चोर सोडून संन्याशाला फाशी...' , मनातल्या भावना बोलून दाखवल्या

Vikas Lawande News : राष्ट्रवादी काँग्रेस शरदचंद्र पवार पक्षाचे प्रवक्ते विकास लवांडे यांना पोलिसांनी ताब्यात घेतले आहे. लवांडे यांनी एक्सवर (ट्विटर) पोस्ट करत याविषयी माहिती दिली आहे. पुणे पोलिसांची चोर सोडून संन्याशाला फाशी, असे त्यांनी आपल्या पोस्टमध्ये म्हटले आहे.

'माझ्यावर जीवघेणा हल्ला करणारे गुंड संग्राम भंडारे व इतर सर्व आरोपी मोकाट असून वाघोली पोलीस स्टेशनचे पोलिस एका खोट्या फिर्यादीवरून कसलाही पुरावा नसताना मला अटक करण्यासाठी मला फोन न करता रात्री घरी आले मी घरी नव्हतो. कुटुंबीयांना माझ्या अटकेबाबत निरोप दिला कुटुंबांना घाबरवण्याचा हा प्रयत्न होता काय ? असा माझा सवाल आहे?', असे त्यांनी आपल्या पोस्टमध्ये म्हटले आहे.

पोलीस मला फोन करू शकले असते. मी फरार नाही किंवा माफीवीर नाही. शासनाने मला जरूर अटक करावी मी पोलिसांना सहकार्य करणारा माणूस आहे कारण मी कायदा पाळणारा माणूस आहे कायदा हातात घेणारा माणूस नाही. सत्यासाठी लढत राहणार सत्याग्रही पद्धतीने जामीन , वकील ,दंड देणार नाही. पुणे पोलिसांनी मला जरूर अटक करावी मी तयार आहे.', असे देखील त्यांनी सांगितले.

विकास लवांडे यांना पोलिसांनी ताब्यात घेतल्यानंतर ते त्यांना घेऊन वाघोली पोलिस ठाण्यात गेले आहे. या विषयी लवांडे यांनीच आपल्या ट्विटच्या माध्यमातून माहिती दिली आहे. लवांडे यांना नेमक्या कोणत्या प्रकरणात पोलिसांनी ताब्यात घेतले आहे, याची माहिती समजू शकली नाही.

वारकरी संप्रदायात घुसखोरीचा आरोप

वारकरी संप्रदायात हिंदुत्ववाद्यांची घुसखोरी झाली आहे, असे सांगत काही महाराजांच्या नावाची यादी राष्ट्रवादी काँग्रेस शरदचंद्र पवार पक्षाचे प्रवक्ते विकास लवांडे यांनी जाहीर केली होती. त्यानंतर बापू भंडारे आणि त्यांच्या सहकाऱ्यांनी लवांडे यांच्यावर शाही टाकली होती. या प्रकरणी त्यांनी पोलिसांमध्ये तक्रार केली होती.