Vinod Tawde On Sharad Pawar : 'कारण, बऱ्याच गोष्टी शरद पवार मोदींकडून करून घेऊ शकतात' ; विनोद तावडेंचं विधान!

Vinod Tawde Pune News : साहित्यरत्न, लोकशाहीर अण्णाभाऊ साठे यांच्यावरील पुस्तकाचे प्रकाशन पुण्यात झाले. बालगंधर्व रंगमंदिरात आयोजित या कार्यक्रमासाठी शरद पवार आणि भाजपचे राष्ट्रीय सरचिटणीस विनोद तावडे यांची प्रमुख उपस्थिती होती. त्यामुळे या कार्यक्रमात हे दोघेही नेते नेमकं काय बोलतात, याची सर्वांनाच उत्सुकता होती.

दरम्यान, विनोद तावडे(Vinod Tawde) यांनी भाषणात शरद पवारांबाबत केलेलं विधान सध्या चांगलच चर्चेत आलं आहे. शरद पवार हे पंतप्रधान नरेंद्र मोदींकडून अनेक कामं करून घेऊ शकतात. असं तावडे म्हणाले. शिवाय, अण्णाभाऊ साठेंना भारतरत्न मिळावा यासाठी मी शरद पवारांसोबत नक्कीच असेन, असंही सांगितलं. याप्रसंगी भाषणात बोलातना शरद पवारांनी अण्णाभाऊ साठे यांना भारतरत्न मिळाला पाहिजे, असं बोलून दाखवलं.

भाषणात विनोद तावडे म्हणाले, 'अण्णाभाऊंचं फारसं प्रकाशित न झालेलं व्यक्तिमत्व किंवा दुर्लक्षित झालेलं त्यांचं साहित्य. या दोन्हींची दखल केवळ महाराष्ट्रानेच नाही, तर संपूर्ण देशाने घेतली पाहीजे आणि पुढची भारतरत्नची जी जबाबदारी आहे, त्यासाठी शरद पवारांच्या(Sharad Pawar) मदतीला मी नक्की असेन. कारण, बऱ्याच गोष्टी ते पंतप्रधान मोदींकडून करून घेऊ शकतात, हे महाराष्ट्राने पाहिलेलं आहे.'

तर 'अण्णाभाऊंना भारतरत्न देणं, याचा अर्थ अण्णाभाऊंची प्रतिष्ठा नव्हे भारतरत्न पुरस्काराची प्रतिष्ठा वाढती राहील. यासाठी याची गरज आहे.' असं शरद पवारांनी यावेळी बोलून दाखवलं.

(Edited by - Mayur Ratnaparkhe)