29 September in History : भाजप अन् शिवसेनेत मनभेदाचे पडले पुढचे पाऊल!

महाराष्ट्रात 2014 मध्ये निवडणुका लागल्या आणि 25 वर्षांचे साथी असलेल्या भाजप-शिवसेनेत दरी पडली. या निवडणुका स्वबळावर लढण्याचे दोन्ही पक्षांनी ठरवले.

याच काळात युती तुटल्याचीही घोषणा झाली. त्यावेळी केंद्रात भाजपला शिवसेनेचा पाठिंबा होता. शिवसेनेचा अपमान झालेला असताना त्यावेळी केंद्रात अवजड उद्योग मंत्री असलेल्या अनंत गितेंनी राजीनामा का दिला नाही, अशी जाहीर विचारणा मनसे अध्यक्ष राज ठाकरे यांनी केली होती.

अखेर उद्धव ठाकरेंनी ( Uddhav Thackeray ) निर्णय घेतलाच आणि दहा वर्षांपूर्वी 29 सप्टेंबरच्याच दिवशी अनंत गिते राजीनामा देतील, अशी घोषणा केली.

आजचे दिनविशेष

1725 : भारतात ब्रिटिश सत्ता दृढ करणारा गव्हर्नर जनरल लॉर्ड रॉबर्ट क्‍लाईव्ह यांचा जन्म.

1925 : फ्रान्सचे पंतप्रधान व नोबेल पुरस्काराचे मानकरी लिआँ व्हीक्तॉर ऑग्यूस्त बूर्झ्वा यांचे निधन. त्यांनी प्राप्तिकर, निवृत्तिवेतन, सामाजिक सुरक्षा, विमा योजना इत्यादींबाबत पुरोगामी धोरणाचा पुरस्कार केला. 1919 मध्ये पॅरिस येथे भरलेल्या शांतता परिषदेतही त्यांनी फ्रान्सचे प्रतिनिधित्व केले व जागतिक शांततेचा पुरस्कार केला. या कार्याबद्दल 1920 चा शांततेसाठीचा नोबेल पुरस्कार त्यांना देण्यात आला.

1932 : मुस्लिम सत्यशोधक मंडळाचे संस्थापक व साहित्यिक हमीद दलवाई यांचा जन्म.

1952 : शिर्डी येथील साई मंदिराच्या कळसाची प्रतिष्ठापना डॉ. रामचंद्र महाराज पारनेरकर यांच्या हस्ते.

1966 : नामवंत कायदेपंडित, मद्रासचे कायदामंत्री, गव्हर्नर जनरलच्या कार्यकारी मंडळाचे सदस्य म्हणून काम पाहिलेले सर सी. पी. रामस्वामी अय्यर यांचे निधन. लंडनमध्ये भरलेल्या गोलमेज परिषदेत सभासद या नात्याने त्यांनी काम केले. त्रावणकोर, अन्नमलई व बनारस विद्यापीठांचे ते कुलगुरू होते.

1997 : "इंडियन रिमोट सेन्सिंग सॅटेलाईट' (आयआरएस-1 डी) या भारतातील पहिल्या अतिप्रगत दूरसंवेदक उपग्रहाचे "पीएसएलव्ही-सी 1' या ध्रुवीय उपग्रह वाहकाद्वारे श्रीहरिकोटा येथील शार तळावरून यशस्वी प्रक्षेपण.