Manoj Jarange Patil News : भल्याभल्यांना घाम फोडणाऱ्या राज ठाकरेंनीही घेतला जरांगेंचा धसका; म्हणाले, ‘ए बाबा...’

Mumbai News : मराठा आरक्षणासाठी उपोषणाच्या माध्यमातून लढा उभारणारे मनोज जरांगे पाटील यांचा भल्याभल्यांनी धसका घेतला आहे. महाराष्ट्र नवनिर्माण सेनेचे प्रमुख राज ठाकरे यांनीही तो घेतल्याचे दिसून आले. मराठा आरक्षणाच्या मंजुरीनंतर प्रतिक्रिया देताना त्यांना जरांगे पाटील यांच्या उपोषणाबाबत प्रश्न विचारताच राज यांनी मजेशीर कमेंट करत त्यावर बोलणे टाळले. (Maratha Reservation News)

राज्य सरकारने आज विधिमंडळाचे विशेष अधिवेशन बोलावून मराठा आरक्षण मंजूर केले. त्यावर राज ठाकरे यांनी प्रतिक्रिया देताना आरक्षण देण्याचा अधिकार राज्य सरकारला आहे का, असा प्रश्न उपस्थित केला. तसेच, आरक्षण जाहीर केले म्हणजे आनंद मानण्यासारखा हा निर्णय नाही’ असे म्हटले आहे. (Maharashtra political News)

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, मराठा आरक्षणाच्या मंजुरीवर खुद्द मनोज जरांगे पाटील यांनीही साशंकता व्यक्त केली आहे. हे आरक्षण टिकेल, असा प्रश्न उपस्थित करत ज्या गोष्टींची मागणी केली नाही, तीच आम्हाला दिली जात आहे, असेही म्हटले आहे. त्यामुळे मनोज जरांगे पाटील यांनी पुन्हा उद्यापासून बेमुदत उपोषण करण्याचा इशारा दिला आहे.

मनोज जरांगे पाटील यांच्या उपोषणाच्या इशाऱ्यावर राज ठाकरे यांना प्रश्न विचारताच राज ठाकरे यांनी ‘ए बाबा, मला त्यावर काही बोलायचं नाही’ असे म्हणत काढता पाय घेतला आहे. त्यामुळे मनोज जरांगे पाटील यांच्या बेधडक बोलण्याचा राज ठाकरे यांनीही धसका घेतल्याचे दिसून येते.

मराठा आरक्षणाच्या विरोधात बोलणाऱ्या बड्या नेत्यालाही जरांगे पाटील यांनी शेलक्या शब्दांत सुनावले आहे. राज्याचे उपमुख्यमंत्री देवेंद्र फडणवीस, अजित पवार यांच्यापासून अनेक नेत्यांना त्यांनी सोडले नाही. प्रत्येक नेत्याला जरांगे पाटील यांनी सडेतोड शब्दांत उत्तर दिलेलं आहे, ते ओळखूनच राज ठाकरे यांनी आज प्रतिक्रिया दिली नसावी, अशी चर्चा रंगली आहे.

R