Mumbai News : राज्यातील मद्यविक्री परवान्यांवर गेल्या 50 वर्षांपासून स्थगिती आहे. 1974 पासून नवीन परवाने देण्यात आले नाहीत. त्यामुळे गेल्या काही दिवसापासून 900 कुटुंबाकडेच मद्यविक्रीची मक्तेदारी आहे. त्याचवेळी राज्यातील 108 तालुक्यात मद्यविक्रीचे एकही दुकान नाही. त्यामुळेच आता राज्याचा महसूल वाढविण्याच्या उद्देशाने मद्यविक्री दुकानांची संख्या वाढविण्याचा निर्णय राज्य उत्पादन शुल्क खात्याने घेतला आहे. मात्र हे परवाने खुले न करता 41 मद्यनिर्मिती करणाऱ्या उद्योगांना प्रत्येकी 8 असे 328 नवे परवाने देण्याचा निर्णय घेतला जाणार असून त्यापैकी 30 टक्के म्हणजेच 96 परवाने हे राजकीय नेत्यांच्या संबधितांच्या घरातच देण्यात येणार आहेत. नव्या मद्य परवान्यांचा लाभ भाजपसह राष्ट्रवादी काँग्रेस आणि राष्ट्रवादी काँग्रेस शरदचंद्र पवार पक्षाला होणार आहे.
राज्य सरकारकडून नव्याने देण्यात येणाऱ्या 328 परवान्यांपैकी 96 परवाने राजकीय नेत्यांना मिळणार आहेत. यापैकी भारतीय जनता पक्षाचे 40, राष्ट्रवादी काँग्रेस अजित पवार (Ajit Pawar) गटाशी संबंधित 32 आणि शरद पवार गटाशी संबंधित 24 नेत्यांना याचा लाभ होणार आहे. 41 पैकी 16 मद्य कारखाने बंद आहेत तर काहींनी परवान्यांच्या लाभासाठी नावाला चालू ठेवले आहेत. या सर्वांच्या वाट्यास मद्यविक्री परवाने येणार आहेत.
41 पैकी 16 मद्य कारखाने बंद
नव्याने परवाने मिळत असलेले 41 पैकी 16 कारखाने बंद आहेत. काही जणांनी केवळ या परवान्यांचा लाभ मिळावा म्हणून हे कारखाने नावापुरते सुरु ठेवण्यात आले आहेत. हे नवे परवाने एक कोटी रुपयांना मिळणार आहेत त्याशिवाय हे परवाने भाडे करारावर देण्याची संधी असल्याने त्यावर कमाई करण्याची संधी असणार आहे.
भाजपशी (BJP) संबंधित असलेलया नेत्यांमध्ये माजी मंत्री दिवंगत डॉ. बळीराम हिरे यांचे पुत्र प्रसाद हिरे यांची ‘डेल्टा डिस्टिलरीज'. राज्याच्या पर्यावरण मंत्री पंकजा मुंडे यांचे पुत्र आर्यमन चारुदत्त पालवे यांची ‘रॅडीको एन.व्ही. डिस्टिलरीज'. केंद्रीय मंत्री नितीन गडकरी यांचे पुत्र सारंग गडकरी संचालक असलेली ‘मानस ॲग्रो इंडस्ट्रीज'. ‘कराड दक्षिण'चे भाजप आमदार डॉ. अतुल भोसले यांच्याशी संबंधित ‘यशवंतराव मोहिते कृष्णा साखर कारखाना'. ‘दक्षिण सोलापूर'चे भाजप आमदार सुभाष देशमुख यांचे पुतणे महेश देशमुख संचालक असलेली ‘लोकमंगल माऊली इंडस्ट्रीज' या कंपन्या प्रत्येकी 8 वाईन शाॅपच्या लाभधारक होणार आहेत.
त्याशिवाय राष्ट्रवादी काँग्रेस अजित पवार पक्षाचे माजी आमदार संजयमामा शिंदे संचालक असलेली ‘विठ्ठल कार्पोरेशन'. मोहोळचे माजी आमदार राजन पाटील यांचे व्यावसायीक भागीदार संचालक असलेली ‘नक्षत्र डिस्टिलरीज अँड ब्रुवरीज'. उपमुख्यमंत्री अजित पवार यांचा मुलगा जय पवार यांचे व्यावसायिक भागीदार असलेल्या सदानंद बापट यांच्या ‘ॲडलर्स बायो एनर्जी' आणि ‘असोसीएटेड ब्लेंडर्स'या कंपन्याना परवाने मिळतील.
त्याशिवाय राष्ट्रवादी काँग्रेस शरद पवार पक्षाचे आमदार जयंत पाटील यांचे पुत्र प्रतीक पाटील अध्यक्ष असलेला ‘राजाराम बापू पाटील सहकारी साखर कारखाना'. ‘शिराळा'चे माजी आमदार मानसिंग नाईक यांचा मुलगा, मुलगी व पत्नी संचालक असलेली ‘विराज अल्कोहोल्स'. राष्ट्रवादी महिला आघाडीच्या प्रदेश उपाध्यक्षा सोनिया होळकर यांचे पती सत्यजीत होळकर संचालक असलेली ‘ग्रेनॉच इंडस्ट्रीज' या कंपन्यांना फायदा होणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.