कॅप्टन अमरिंदरसिंगांचा नवीन पक्ष अन् नावातच काँग्रेस!

नवी दिल्ली : पंजाबच्या (Punjab) मुख्यमंत्री (Chief Minister) पदावरून हटवल्यानंतर कॅप्टन अमरिंदरसिंग (Amarinder Singh) यांनी काँग्रेस (Congress) विरोधात आक्रमक पवित्रा घेतला आहे. त्यांनी स्वतंत्र पक्ष स्थापन करण्याची घोषणा केली होती. आज त्यांनी पक्षाच्या नावाची घोषणा केली आहे. पुढील वर्षी राज्यात होणाऱ्या विधानसभा निवडणुकीत त्यांचा पक्ष स्वतंत्रपणे मैदानात उतरणार आहे.

कॅप्टन यांनी नवीन पक्षाचे नाव पंजाब लोक काँग्रेस, असे जाहीर केले आहे. त्यांनी नावात काँग्रेसचा वापर केल्याने अनेकांच्या भुवया उंचावल्या आहेत. कॅप्टन यांनी आजच काँग्रेसचा राजीनामा दिला. काँग्रेस सोडण्याची घोषणा केल्यानंतर अखेर कॅप्टन यांनी अखेर राजीनामा दिला. त्यांनी काँग्रेस अध्यक्षा सोनिया गांधी यांना पाठवलेल्या राजीनामापत्रात प्रदेशाध्यक्ष नवज्योतसिंग सिद्धू यांच्यासह नेते राहुल गांधी आणि प्रियांका गांधी यांच्यावर तोफ डागली आहे.

कॅप्टन अमरिंदरसिंग यांनी राजीनामा पत्रात म्हटले की, मला व माझ्या सरकारला बदनाम करुन प्रसिद्धी मिळवणे हेच एकमेव काम सिद्धू यांनी केले आहे. त्यांना राहुल आणि प्रियांका गांधींनी पाठबळ दिले. त्यावेळी तुम्हीही सिद्धू यांच्या कारवायांकडे कानाडोळा केला. त्यांना हरीश रावत यांनी प्रोत्साहन पाठबळ दिले. रावत हे अतिशय दुटप्पी व्यक्ती आहेत.

पक्षाच्या स्थापनेची घोषणा करताना कॅप्टन अमरिंदरसिंग म्हणाले होते की, आमच्यासोबत अनेक काँग्रेस नेते आहेत. पक्षाची स्थापना झाल्यानंतर या नेत्यांची नावे आम्ही जाहीर करू. पंजाबमधील सर्वच्या सर्व 117 जागा आमचा पक्ष लढवेल. आम्ही स्वबळावर लढणार की आघाडी करणार याचे उत्तर तुम्हाला आगामी काळात मिळेल. पक्षाच्या नावाची घोषणा लवकरच होईल. कारण आमचे वकील निवडणूक आयोगासोबत या संदर्भात चर्चा करीत आहेत.

भाजपसोबत आघाडी करण्याच्या मुद्द्यावर ते म्हणाले होते की, आमचा पक्ष जागावाटपाच्या संदर्भात प्रस्ताव आल्यास विचार करेल. परंतु, आम्ही भाजपसोबत जाणार आहोत, असे आम्ही कधीच म्हटले नव्हते. मी फक्त म्हटले होते की मी आणि माझा पक्ष जागावाटपाबाबत चर्चा करीत आहोत. अद्याप आघाडी करण्याविषयी कोणतीही चर्चा राजकीय पक्षांशी झालेली नाही.

कॅप्टन यांच्या पक्षस्थापनेच्या हालचालींना पंजाबचे राजकारण ढवळून निघाले आहे. त्यांनी अकाली दलाचे विविध गटांना सोबत घेण्यासाठी पावले उचलली आहेत. असे असले तरी सर्वच राजकीय पक्ष याबाबत सावध प्रतिक्रिया देत आहेत. पुढील वर्षाच्या सुरवातीला पंजाबमध्ये विधानसभा निवडणुका होत आहेत. यामुळे आतापासूनच सर्वच पक्षांकडून जोरदार मोर्चेबांधणी सुरू झाली आहे. कॅप्टन यांच्याकडे भाजपनेही मैत्रीचा हात पुढे केला आहे.