पणजी : केंद्रीय मंत्री श्रीपाद नाईक (Sripad Naik) यांचे पुत्र सिद्धेश नाईक (Siddhesh Naik) हे बंडाच्या पवित्र्यात आहेत. यामुळे भाजपमधील (BJP) मतभेद चव्हाट्यावर आले आहेत. गोव्यात (Goa) विधानसभा निवडणुकीच्या (Assembly Election) तोंडावर हा वाद उफाळून आला आहे. महाराष्ट्राचे माजी मुख्यमंत्री देवेंद्र फडणवीस (Devendra Fadnavis) हे गोव्याचे भाजप प्रभारी असल्याने यातून मार्ग काढण्याची जबाबदारी त्यांच्यावर आली आहे.
गोव्याचे माजी मुख्यमंत्री मनोहर पर्रीकर यांचे पुत्र उत्पल पर्रीकर यांनी पक्षाविरोधात बंड केले असताना आता आणखी एका बड्या नेत्याच्या मुलाची यात भर पडण्याची चिन्हे आहेत. श्रीपाद नाईक हे केंद्रीय राज्यमंत्री आहेत. ते गोव्यातील भाजपचे वजनदार नेते मानले जातात. त्यांचे पुत्र सिद्धेश यांनी विधानसभा निवडणुकीसाठी शड्डू ठोकला आहे. त्यांना तिकीट नाकारण्यात आल्याने ते बंड करतील, अशी चर्चा सुरू झाली आहे. उमेदवारी अर्ज भरण्यास केवळ दोनच दिवस शिल्लक असल्याने त्यांना लवकरात लवकर निर्णय घ्यावा लागणार आहे. (Siddhesh Naik News Updates)
भाजपने 34 उमेदवारांची पहिली यादी 21 जानेवारीला जाहीर केली होती. उर्वरित 6 उमेदवारांची दुसरी यादी काल (ता.26) जाहीर करण्यात आली आहे. या दुसऱ्या यादीत कुंभारजुवेमधून आमदार पांडुरंग मडकईकर यांच्या पत्नी जनिता मडकईकर यांना उमेदवारी देण्यात आली आहे. यामुळे श्रीपाद नाईक हे दुखावले गेले आहेत. पक्षाने हा निर्णय घेताना सिद्धेश नाईक हे भाजपच्या केंद्रीय मंत्र्यांचे पुत्र असल्याचा विचार केलेला नाही. यामुळे ते आता बंडखोरी करतील, अशी चर्चा मोठ्या प्रमाणात सुरू आहे. त्यांनी बंडखोरी केल्यास भाजपला निवडणुकीच्या तोंडावर मोठा धक्का बसू शकतो. (Goa Election News)
भाजपने उमेदवारी नाकारल्याने अनेक नेत्यांनी निवडणुकीच्या तोंडावर पक्षाला रामराम केला आहे. त्यात उत्पल पर्रीकर, लक्ष्मीकांत पार्सेकर, इजिदोर फर्नांडिस, एलिना साल्ढाना याचा समावेश आहे. सिद्धेश नाईक हे कुंभारजुवेतून निवडणूक लढवण्यास इच्छुक आहेत. या मतदारसंघातून ते आधीपासूनच तयारी करीत आहेत. आता ते पक्षत्याग करून अपक्ष निवडणूक लढणार की दुसरा पर्याय निवडणार याकडे लक्ष लागले आहे.
भाजपच्या बड्या नेत्यांच्या मुलांनी जाहीरपणे पक्षाकडे मागणी केल्याने पक्षातील मतभेद चव्हाट्यावर आले आहेत. उत्पल पर्रीकर आणि सिद्धेश नाईक यांना पक्षाने उमेदवारी द्यावी, असा सूर पक्षाच्या कार्यकर्त्यांचा होता. मात्र, या दोघांनी दावा केलेल्या मतदारसंघातील विद्यमान आमदारांचे काय करायचे, असा प्रश्न भाजप नेतृत्वाला पडला होता. उत्पल आणि सिद्धेश यांनी उमेदवारी दिल्यास दोन्ही मतदारसंघात बंडखोरीचा फटका बसण्याचा धोकाही भाजपसमोर होता. यामुळे पक्ष नेतृत्वाने दोघांनाही उमेदवारी दिली नाही.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.