Amravati MLC Election : अमरावती 'शिक्षक'मध्ये अपक्ष ठरणार 'बाजीगर'! सरनाईक-पोहरेंमध्ये थेट लढत; कोणाचे गणित बिघडणार?

Amravati Teachers Constituency Election Kiran Sarnaik vs Aditi Pohare : महायुतीचे उमेदवार किरण सरनाईक यांच्या प्रचारासाठी भाजपनेते सक्रीय झाले आहे. तर, काँग्रेसच्या उमेदवार आदिती पोहरे यांच्यासाठी शिक्षण संस्था सक्रिया आहे.
Amravati Teachers Constituency Election Kiran Sarnaik vs Aditi Pohare
Amravati Teachers Constituency Election Kiran Sarnaik vs Aditi Poharesarkarnama
Published on: 
Updated on: 

Amravati Teachers Election : अमरावती विभाग शिक्षक मतदारसंघाच्या निवडणुकीत महायुतीचे विद्यमान आमदार किरण सरनाईक आणि महाविकास आघाडीच्या प्रा. आदिती पोहरे यांच्यात प्रमुख लढत दिसत आहे. दोन्ही उमेदवारांच्या बाजूने स्वतंत्र राजकीय आणि संघटनात्मक ताकद उभी राहत असताना, विविध पक्षांतील बंडखोर आणि शिक्षक संघटनांच्या नेत्यांनी अपक्ष म्हणून उमेदवारी कायम ठेवल्याने निवडणुकीचे गणित गुंतागुंतीचे झाले आहे.

महायुतीचे उमेदवार किरण सरनाईक यांच्या प्रचारासाठी भाजपमधील ज्येष्ठ नेते सक्रिय झाल्याचे चित्र आहे. अकोल्याचे पालकमंत्री तथा कामगार मंत्री अॅड. आकाश फुंडकर, खासदार अनुप धोत्रे, आमदार रणधीर सावरकर स्वतः शिक्षक मतदारांच्या संपर्कात आहेत. शिवाय शिंदे गटातील नेतेही प्रचारार्थ मैदानात उतरले आहेत. त्यामुळे महायुतीचे राजकीय पाठबळ त्यांच्या प्रचारातील महत्त्वाचा घटक ठरत आहे. मात्र, भाजपच्या संगीता शिंदे यांनी बंडखोरी करत स्वतंत्र उमेदवारी कायम ठेवल्याने पक्षांतर्गत मतभेदही समोर आले आहेत. त्यामुळे भाजपच्या प्रचारयंत्रणेचे पाठबळ आणि प्रत्यक्ष मतदानातील मतांचे गणित यांची सांगड कशी घातली जाते, हे महत्त्वाचे ठरणार आहे.

पोहरे यांच्या पाठीशी शिवाजी शिक्षण संस्था

महाविकास आघाडीच्या उमेदवार प्रा. आदिती पोहरे यांच्या बाजूने शिवाजी शिक्षण संस्था सक्रिय असल्याचे चित्र आहे. संस्थेचे अध्यक्ष हर्षवर्धन देशमुख यांच्या त्या कन्या आहेत. त्यामुळे संस्थेचे संपर्कजाळे आणि शिक्षकांमधील संबंध त्यांच्या प्रचाराच्या दृष्टीने महत्त्वाचे ठरू शकतात. शिवाजी शिक्षण संस्थेचे तब्बल साडेपाच हजार मतदार आहेत. तथापि, या पाठबळाचे प्रत्यक्ष मतदानात किती रूपांतर होते, यावर त्यांच्या मतांचे गणित अवलंबून राहील.

Amravati Teachers Constituency Election Kiran Sarnaik vs Aditi Pohare
MLC Election : एकनाथ शिंदेंच्या शिक्षक सेनेने भाजपला घेरलं; तब्बल 10 हजार 500 शिक्षक मतदानापासून दूर राहणार!

अपक्ष उमेदवारांमुळे बहुकोनी लढत

या निवडणुकीत भाजपचे खासदार डॉ. अनिल बोन्डे यांच्या भगिनी संगीता शिंदे, शिक्षक महासंघाचे शेखर भोयर, प्रा. सुमित पवार आणि शिक्षक आघाडीचे नेते तथा शिवसेनेच्या शिंदे गटाशी संबंधित श्रीकांत देशपांडे हे अपक्ष म्हणून निवडणूक लढवत आहेत. याशिवाय शिवसेना (उद्धव बाळासाहेब ठाकरे) गटाकडून बुलढाण्याचे प्रा. दत्तात्रय ऊर्फ डी. एस. लहाने मैदानात आहेत.

शेखर भोयर हे शिक्षक महासंघाचे नेते असून, तिवसा मतदारसंघाचे आमदार राजेश वानखडे यांचे ते मेहुणे आहेत. त्यांच्या उमेदवारीमुळे शिक्षक संघटनांशी संबंधित स्वतंत्र राजकीय समीकरणही या निवडणुकीत चर्चेत आले आहे.

मतविभाजन ठरणार महत्त्वाचे

सरनाईक आणि पोहरे या दोन्ही प्रमुख उमेदवारांच्या बाजूने वेगवेगळ्या स्वरूपाचे पाठबळ दिसत असले, तरी अन्य उमेदवारांची उपस्थिती दुर्लक्षित करता येणार नाही. भाजपमधील बंडखोरीमुळे सरनाईक यांच्या बाजूच्या मतांचे विभाजन होण्याची शक्यता आहे, तर दत्तात्रय लहाने यांच्या उमेदवारीमुळे पोहरे यांच्या बाजूच्या संभाव्य मतांच्या गणितावरही परिणाम होऊ शकतो. मात्र, हे विभाजन नेमके किती आणि कोणाच्या मतांवर होईल, हे उपलब्ध माहितीवरून निश्चित सांगता येत नाही.

एकूणच, अमरावती विभाग शिक्षक मतदारसंघात किरण सरनाईक आणि प्रा. आदिती पोहरे यांच्यात प्रमुख लढत असून, दोघांच्या बाजूने असलेल्या संघटनात्मक पाठबळाची प्रत्यक्ष मतदानात किती परिणामकारकता दिसते, याला महत्त्व राहील. महायुतीतील बंडखोरी, शिक्षक महासंघाच्या नेत्यांची स्वतंत्र उमेदवारी आणि इतर अपक्षांची भूमिका यामुळे निवडणुकीचे गणित बहुकोनी झाले आहे. त्यामुळे या लढतीचे चित्र स्पष्ट होण्यासाठी प्रमुख उमेदवारांच्या पाठबळाबरोबरच इतर उमेदवारांमुळे होणाऱ्या मतविभाजनाचाही विचार करावा लागणार आहे.

Amravati Teachers Constituency Election Kiran Sarnaik vs Aditi Pohare
MLC Election: शिक्षक/पदवीधर मतदारसंघांसाठी काँग्रेसचे उमेदवार जाहीर; कुठल्या विभागातून कोणाला मिळाली संधी?

सरकारनामाचे सदस्य व्हा

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.