Mumbai BMC election : मुंबई महापलिका निवडणुकीत चुरस; ठाकरे बंधूंची युती झाल्यास शिंदेंच्या शिवसेनेसाठी लढाई अधिक खडतर!

Mumbai News : दिवाळीनंतर स्थानिक स्वराज्य संस्थेच्या निवडणुकीचा बार उडणार आहे, त्यामुळे उत्सुकता शिगेला पोहचली आहे. राज्यातील सर्वच राजकीय पक्ष निवडणुकीच्या तयारीला लागले आहेत. विशेषतः सर्वच पक्षांचे लक्ष मुंबई महापालिकेवर आहे. गेल्या वर्षभरापासून भाजपने मुंबई महापालिका ताब्यात मिळवण्यासाठी प्रयत्न सुरु केले आहेत. त्यामुळे महायुतीची सर्वच यंत्रणा तयार आहे. दुसरीकडे हिंदी सक्तीच्या विरोधात एकत्र आलेल्या राज व उद्धव ठाकरे या बंधूनी आगामी महापालिका निवडणुका डोळ्यासमोर ठेवून प्लनिंग सुरु केले आहे.

गेल्या वर्षभरापासून एकनाथ शिंदे (Eknath shinde) यांच्या शिवसेनेने मुंबईतील उद्धव ठाकरे यांच्या शिवसेनेचे 65 नगरसेवक गळाला लावले आहेत. त्यामुळे त्यांचे पारडे जड वाटत असताना आता येत्या काळात ठाकरे बंधू राजकीयदृष्ट्या एकत्र येणार असल्याचा फायदा त्यांना होणार असल्याचे दिसून येत आहे. त्यामुळे मुंबईत शिरकाव करू पाहणाऱ्या एकनाथ शिंदेंच्या समोर आव्हान उभे टाकले आहे.

कोर्टाने राज्यातील निवडणुका जानेवारीच्या आत घेण्याचे आदेश दिले आहेत. त्यामुळे यंत्रणा निवडणुकीच्या कामाला लागली आहे. त्यामुळे नोव्हेंबरमध्ये जिल्हा परिषद व पंचायत समिती तर डिसेंबर महिन्यात नगरपरिषदेच्या निवडणूका होणार आहेत तर जानेवारी महिन्यात मुंबई, पुण्यासह राज्यतील सर्वच महापालिकेच्या निवडणूका होणार आहेत. त्यामुळे महायुती व महहविकास आघाडी काय रणनीती आखणार याकडे लक्ष लागले आहे.

ठाकरे बंधुच्या एकत्र येण्यामुळे मुंबई महापालिकतीळ चित्र 360 डिग्रीमध्ये बदलेले आहे. त्यामुळे निवडणुकीचे चित्र बदलले आहे. मधल्या काळात शिंदेंच्या शिवसेनेने मुंबई महापालिकेवर वर्चस्व प्राप्त करण्यासाठी आतापर्यंत ठाकरे सेनेतील ६५ माजी नगरसेवकांना प्रवेश दिला आहे. एकनाथ शिंदे यांचे ठाणे, नवी मुंबई, कल्याण, नाशिक या महापालिकेत वर्चस्व आहे. मात्र, मुंबई महापालिकेत वर्चस्व मिळवण्यासाठी एकनाथ शिंदे प्रयत्नशील असून त्यामुळे त्यांनी गेली काही दिवसात उद्धव ठाकरे (Uddhav thackeray) यांच्या शिवसेनेतील बड्या नेत्यांना फोडले आहे.

हिंदी सक्तीच्या विरोधात एकत्र आलेले राज व उद्धव ठाकरे हे बंधू गेल्या दोन महिन्यात पाच वेळा एकत्र आले. त्यामुळे येत्या काळात मनसे व उद्धव ठाकरेंची शिवसेना यांची युती होण्याची शक्यता आहे. त्यातच आता सोमवारी घटस्थापनेदिवशी शिवाजी पार्कमधील जिमखान्याचे भूमिपूजन करण्यासाठी पुन्हा राज व उद्धव ठाकरे बंधू एकत्र येणार असल्याचे समजते. त्या कार्यक्रमाची तयारी जोरात सुरु आहे. तर दुसरीकडे आगामी काळात होत असलेल्या दसरा मेळाव्याच्या निमित्ताने उद्धव व राज ठाकरे पहिल्यांदा एकत्र येणार आहेत. त्याठिकाणीच मनसे व उद्धव ठाकरे यांच्या शिवसेनेच्या युतीची घोषणा होऊ शकते. त्यामुळे आगामी महापलिका निवडणुकीत ठाकरे बंधूंची रणनिती यशस्वी होण्याची शक्यता आहे.

महायुतीमधील भाजपची भिस्त ही मुंबईतील गुजराती, मारवाडी व उत्तर भारतीय मतांवर आहे. उत्तर मुंबईतील घाटकोपर, मुलुंड परिसरात भाजपचे वर्चस्व आहे. दुसरीकडे एकनाथ शिंदे यांचा सामना मुंबईतील मराठी बाहुल मतदारसंघात ठाकरे बंधूंच्या युतीसोबत होणार आहे. त्यामुळे त्याठिकाणी ठाकरे बंधूंचा मुकाबला करताना एकनाथ शिंदे यांच्या शिवसेनेची दमछाक होणार आहे.

एकीकडे गेल्या काही दिवसापासून एकनाथ शिंदे यांनी मुंबईत तयारी सुरु केली आहे. काही बड्या नेत्यावर याठिकाणची जबाबदारी दिली आहे. माजी नगरसेवकांना कामाला लागण्याच्या सूचना केल्या आहेत. तर दुसरीकडे दसरा मेळाव्याला काय होणार याची उत्सुकता लागली आहे. त्यामुळे सर्वांचेच मुंबई महापालिका निवडणुकीत काय होणार? याकडे लक्ष लागले आहे.