Ausa Assembly 2024 Result: औसाः अभिमन्यू पवारांनी चक्रव्यूह भेदला; दिनकर माने यांचा पराभव

Latur News : मराठा आरक्षण आंदोलनाचे नेते मनोज जरांगे पाटील यांनी कोणते उमेदवार पाडायचे, याची यादी जाहीर केली होती. त्यात औसा मतदारसंघाचा समावेश होता. नंतर त्याबाबत जरांगे पाटील फारसे बोलले नव्हते, मात्र तोपर्यंत मराठा समाजात जायचा तो संदेश गेला. त्यामुळे देवेंद्र फडणवीस यांचे निकटवर्तीय आमदार अभिमन्यू पवार यांच्या अडचणी वाढल्या होत्या. मात्र त्यावर मात करत त्यांनी 33,462 मतांनी विजय मिळवला. (Ausa Assembly 2024 Result News)

मराठा आरक्षण आंदोलनामुळे औशाचे आमदार अभिमन्यू पवार चर्चेत आले होते. अभिमन्यू पवार हे उपमुख्यमंत्री देवेंद्र फडणवीस यांचे निकटवर्तीय आहेत. मराठा आरक्षण आंदोलनाचे नेते मनोज जरांगे यांनी सुरुवातीला कोणते उमेदवार पाडायचे, या मतदारसंघांची यादी जाहीर केली होती. त्यात लातूर जिल्ह्यातील औसा मतदारसंघाचा समावेश होता. अभिमन्यू पवार हे या चक्रव्यूहात अडकलेले असताना उद्धव ठाकरे यांचे शिलेदार दिनकर माने यांनी आव्हान निर्माण केले होते. हे आव्हान लीलया पेलत चक्रव्यूह भेदण्यात अभिमन्यू पवार यशस्वी झाले आहेत. त्यांनी माने यांचा 33,462 मतांनी पराभव केला

औसा विधानसभा मतदारसंघात 2019 मध्ये भाजपचे अभिमन्यू पवार आणि त्यावेळी काँग्रेसमध्ये असलेले बसवराज पाटील (मुरुमकर) यांच्यात लढत झाली होती. पवार यांनी पाटील यांचा पराभव केला होता. उमरगा मतदारसंघ 2009 मध्ये राखीव झाल्यानंतर काँग्रेसने पाटील यांना औशातून उमेदवारी दिली होती. त्यांनी सलग दोनवेळा विजय मिळवला होता. लोकसभा निवडणुकीच्या तोंडावर बसवराज पाटील यांनी काँग्रेसमध्ये प्रवेश केला होता. विशेष म्हणजे, पाटील यांनी या निवडणुकीत पवार यांच्यासाठी प्रचार केला. ते पवार यांच्यासाठी फायदेशीर ठरले.

महाविकास आघाडीत औसा मतदारसंघ कोणाला सुटणार, याचा तिढा उमेदवारी अर्ज भरण्याच्या तारखेपर्यंत सुटला नव्हता. काँग्रेसने या मतदारसंघावर मजबूत दावा केला होता. काँग्रेसकडून श्रीशैल्य उटगे इच्छुक होते, त्यांनी तयारीही सुरू केली होती. मात्र मतदारसंघ शिवसेना उद्धव बाळासाहेब ठाकरे पक्षाला सुटला आणि माजी आमदार दिनकर माने यांना उमेदवारी मिळाली. 2009 आणि 2014 च्या निवडणुकीत त्यावेळी काँग्रेसमध्ये असलेले बसवराज पाटील यांनी दिनकर माने यांचा पराभव केला होता. 2019 मध्ये शिवसेना-भाजपची युती होती. देवेंद्र फडणवीस यांनी उद्धव ठाकरे यांच्याकडे आग्रह करून औसा भाजपकडे घेतला होता.

अभिमन्यू पवार हे फडणवीस यांचे स्वीय सहायक होते. पवार यांच्यासाठीच त्यांनी औसा मतदारसंघ भाजपकडे घेतला होता. दिनकर माने यांनी 1999 आणि 2004 मध्ये या मतदारसंघातून विजय मिळवला होता. या मतदारसंघात त्यांचाही संपर्क आहेच. निलंगा तालुक्यातील कासारशिरसीसह 68 गावांचा औसा विधानसभा मतदारसंघात समावेश आहे. कासारशिरसी येथे उद्धव ठाकरे यांची सभा झाली होती. या सभेत या भागातील भाजपच्या अनेक प्रमुख नेत्यांनी शिवसेना उद्धव बाळासाहेब ठाकरे पक्षात प्रवेश केला. त्यामुळे पवार यांची अडचण झाली होती.

देवेंद्र फडणवीस यांच्यामुळेच मराठा समाजाला आरक्षण मिळाले नाही, असा आरोप मनोज जरांगे पाटील यांनी अनेकवेळा केला आहे. अभिमन्यू पवार हे फडणवीस यांचे निकटवर्तीय आहेत. मराठा आरक्षणाला विरोध करणाऱ्यांना पाडा, असा संदेश जरांगे पाटील यांनी आधी दिला होता. कोणाला पाडायचे, अशा मतदारसंघांची यादी त्यांनी जाहीर केली होती. त्यात औसा मतदारसंघाचे नाव होते. नंतर जरांगे पाटील यांनी कोणाला पाडायचे ते पाडा, असा संदेश दिला. मात्र तौपर्यंत औसा मतदारसंघासाठीचा संदेश मराठा समाजात पोहोचला होता.

औसा मतदारसंघात लातूरच्या देशमुखांचे, विशेषतः माजी मंत्री दिलीपराव देशमुख यांचे वजन आहे. त्यांच्या शब्दाला मान देणारा वर्ग मोठा आहे. मात्र देशमुखांची जादू या निवडणुकीत चालू शकली नाही. काँग्रेसमध्ये स्थान बळकट करण्यासाठी अमित देशमुख यांना जास्तीत जास्त उमेदवार निवडून आणणे गरजेचे होते. मात्र त्यांचीच लातूर शहर मतदारसंघात कोंडी झाली होती. त्यामुळे देशमुखांना औसा मतदारसंघात अधिक लक्ष देता आले नाही.

एखाद्या आमदाराने अमाप संपत्ती जमवली, खूप पैसा कमवला असा प्रचार झाला की मतदारांमध्ये त्या आमदाराविषयी चीड निर्माण होता. प्रचार एेन भरात असताना दिनकर माने यांनी अभिमन्यू पवार यांच्यावर प्रचंड पैसा कमावल्याचा आरोप केला. त्यांच्या प्रॉप्रटीचे कागदपत्रेही जाहीर सभांमधून लोकांना दाखवली. मात्र पवार यांनी मतदारसंघात केलेल्या विकासकामांसमोर हे आरोप फिके पडले. वाढती महागाई आणि सोयाबीनच्या घसरलेल्या दरावर लाडकी बहीण योजना आणि मतदारसंघातील विकासकांमानी मात केली आणि फडणवीस यांचे लाडके अभिमन्यू पवार विजयी झाले.