Thackeray brothers alliance : ठाकरे बंधूंची 6 महापालिकेतील युती पक्की; मुंबईत मराठीबहुल प्रभागांसाठी मात्र जोरदार रस्सीखेच

Mumbai News : राज्यात लवकरच महापालिकेच्या निवडणुकीची घोषणा होणार आहे. त्या दृष्टीने सर्वच पक्षांनी तयारी सुरु केली आहे. विशेषता मुंबई महापालिकेवर गेल्या 25 वर्षांपासून शिवसेनेची सत्ता आहे. ही सत्ता खेचण्यासाठी भाजपकडून तयारी केली जात असतानाच आता उद्धव ठाकरेंच्या शिवसेनेने दोन पावले पुढे टाकत राज ठाकरे यांच्या मनसेसोबत युती करण्याची तयारी सुरु केली आहे. त्यासाठी माजी मुख्यमंत्री उद्धव ठाकरे व मनसेचे प्रमुख राज ठाकरे यांच्यात सविस्तर चर्चा झाली आहे. त्यामुळे ठाकरे बंधूंची मुंबईसह 'या' सहा महापालिकेतील युती पक्की समजली जात असून मुंबईतील मराठीबहुल भागातील प्रभागांसाठी उद्धव अन् राज यांच्यात जोरदार रस्सीखेच दिसून येत आहे.

गेल्या पाच महिन्यात माजी मुख्यमंत्री, शिवसेना ठाकरे गटाचे प्रमुख उद्धव ठाकरे मनसेप्रमुख राज ठाकरे यांच्या जवळपास 13 वेळा भेटी झाल्या आहेत. त्यानंतर गुरुवारी पुन्हा एकदा ठाकरे बंधूमध्ये शिवतीर्थ या निवासस्थानी दोन पक्षातील युतीविषयी चर्चा झाली. यावेळी मनसे व उद्धव ठाकरे यांची शिवसेना राज्यातील सहा महापालिकेच्या निवडणुका एकत्र लढणार आहे. मुंबई महापालिकेसह कल्याण-डोंबिवली, नवी मुंबई, ठाणे, नाशिक, पुणे महापालिकेत ठाकरेंची शिवसेना आणि मनसेची युती होणार आहे.

ही युती होणार असली तरी त्याठिकाणच्या युतीची बोलणी करण्याचे अधिकार या पक्षांना देण्यात आले आहेत. ठाणे महापालिका निवडणुकीच्या अनुषंगाने ठाकरेंच्या शिवसेनेकडून राजन विचारे, तर मनसेकडून अविनाश जाधव यांना जागा वाटपाची चर्चा करण्याची जबाबदारी देण्यात आली आहे. त्यासोबतच कल्याण-डोंबिवली महापालिकेमध्ये मनसेचे माजी आमदार राजू पाटील, तर ठाकरेंच्या शिवसेनेकडून (Shivsena) आमदार वरूण सरदेसाई यांच्याकडे जागा वाटपाच्या चर्चेची जबाबदारी असणार आहे.

ठाकरे बंधूंमध्ये रस्सीखेच

मुंबईतील मराठीबहुल भागातील दादर, माहिम, वरळी, शिवडी, भायखळा, भांडूप, जोगेश्वरी या प्रभागांसाठी दोन्ही ठाकरे बंधूंमध्ये रस्सीखेच सुरु आहे. कोण कुठून लढणार? याबाबत ठाकरे बंधूंच्या चर्चेमध्ये ठोस तोडगा निघाला नसल्याची माहिती समोर आली आहे. त्यामुळे दोन्ही बंधुंमध्ये चर्चेच्या आणखी काही फेऱ्या अपेक्षित आहेत. निवडून येवू शकणाऱ्या एकेका जागांवर सखोल चर्चा राज ठाकरे आणि उद्धव ठाकरे (Uddhav Thackeray) यांच्यात होत आहे. त्यामुळे जागावाटपाला वेळ लागणार आहे. त्यामुळे अजून काही दिवस चर्चा केली जाणार असल्याचे समजते.

जागावाटपात उद्धव ठाकरेंची अडचण

दोन्ही पक्षामध्ये जागावाटपाची चर्चा सुरु असली तरी मराठीबहुल भागातील अधिकाधिक जागा मिळाव्यात, यासाठी मनसे आग्रही असल्याची सुत्रांची माहिती आहे. शिवसेना ठाकरेंकडे विद्यमान नगरसेवक असलेल्या 20 ते 25 जागांचीही मनसेकडून मागणी करण्यात आली आहे. त्यासोबतच ठाकरेंकडून शिंदे गटात गेलेल्या काही नगरसेवकांच्या जागांसाठीही मनसे आग्रही असल्याची माहिती समोर येत आहे. शिवसेना ठाकरे गटाची ताकद असलेल्याच अनेक जागा मनसे मागत असल्याने ठाकरे गटाची अडचण झाली आहे. परंतु मनसेची संबंधित प्रभागातील संघटनात्मक ताकद, तगडा उमेदवार बघूनच जागा सोडण्यावर शिवसेना ठाकरे गट ठाम आहे.