Mumbai, 30 August : मनोज जरांगे पाटील हे मराठा आरक्षणाच्या मागणीसाठी मुंबईतील आझाद मैदानात शुक्रवारपासून (ता. 29 ऑगस्ट) आंदोलन करत आहेत. छत्रपती शिवाजी महाराज रेल्वे स्थानकात (सीएसएमटी) आंदोलकांनी ठाण मांडलेले आहेत. मुंबईकरांना त्रास होतो आहे. दुसरीकडे, मराठा आणि ओबीसींमध्ये वाद सुरू झालेला आहे. याबाबत महाराष्ट्र नवनिर्माण सेनेचे प्रमुख राज ठाकरेंनी भाष्य केले आहे. मराठा आरक्षणासंदर्भात सर्व प्रश्नांची उत्तरे फक्त एकनाथ शिंदे हेच देऊ शकतात, त्यांनाच याबाबत विचारा, असेही ठाकरेंनी म्हटले आहे.
स्थानिक स्वराज्य संस्थांच्या आगामी निवडणुकीच्या पार्श्वभूमीवर महाराष्ट्र नवनिर्माण सेनेच्या (MNS) प्रमुख पदाधिकारी, कार्यकर्ते यांची मुंबईत बैठक झाली. त्या बैठकीत आगामी निवडणुकीसंदर्भात स्ट्रॅटेजी ठरविणच्या दृष्टीने चर्चा झाली. त्यानंतर माध्यमांशी बोलताना राज ठाकरे यांनी मनोज जरांगे पाटील यांच्या आंदोलनाबाबत भाष्य केले आहे.
मराठा आरक्षणाच्या मागणीसाठी मनोज जरांगे पाटील यांनी मुंबईत आझाद मैदानावर बेमुदत उपोषणाला सुरुवात केली आहे. काही आंदोलकांनी छत्रपती शिवाजी महाराज रेल्वे स्थानकात ठाण मांडून आहेत. मराठा आणि ओबीसींमध्ये वाद सुरू झाला आहे. महाराष्ट्रात जाती पातीचं राजकारण सुरू झालं आहे. या सर्व प्रश्नांवर महाराष्ट्र नवनिर्माण सेनेचे प्रमुख राज ठाकरे (Raj Thackeray) यांनी, ‘मला असं वाटतंय की, या सगळ्या गोष्टींची उत्तरं तुम्हाला एकनाथ शिंदे हेच देऊ शकतील. मी या प्रश्नांवर उत्तर देऊ शकत नाही. ते जेव्हा येतील, त्यांना विचारा, असे म्हटले आहे.
मराठा आरक्षण मिळणार नाही, असं तुम्ही म्हटलं होतं. त्यावरही राज ठाकरे म्हणाले, तो विषय झाला आता. त्या सगळ्या गोष्टी सर्वांना माहिती आहेत की काय आहेत त्या. पण, या सर्व प्रश्नांवरील उत्तरे तुम्हाला फक्त उपमुख्यमंत्री एकनाथ शिंदे (Eknath Shinde) हेच देऊ शकतील.
मुंबईकरांना त्रास होतोय, या आंदोलनाचा फटका मुंबईकरांना बसत आहे. या सर्व प्रश्नांवर माझ्याकडे एकच उत्तर आहे. जेव्हा एकनाथ शिंदे येतील, तेव्हा त्यांना विचारा. मुंबईकरांना फार त्रास होतो आहे. मागच्या वेळी तेच नवी मुंबईला गेले होते ना? त्यांनी त्या वेळी मराठा आरक्षणाचा प्रश्न सोडविला होता ना? मग हे परत का आले आहेत?, या सर्व प्रश्नांची उत्तरे फक्त एकनाथ शिंदेंच देऊ शकतात, असेही राज ठाकरे यांनी म्हटले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.