Arvind Kejriwal: कोर्टानं ताशेरे ओढल्यानंतर दिल्ली पोलिसांची केजरीवालांच्या विरोधात तक्रार

सार्वजनिक मालमत्तेचे नुकसान केल्याप्रकरणी आम आदमी पक्षाचे राष्ट्रीय संयोजक अरविंद केजरीवाल यांच्या विरोधात दिल्ली पोलिसांनी तक्रार दाखल केली आहे. दिल्लीतील राऊज अॅव्हेन्यू कोर्टात याबाबतचा अहवाल पोलिसांनी सादर केला आहे. याबाबतची सुनावणी १८ एप्रिलला होणार आहे.

यापूर्वीही याप्रकरणात राऊज अॅव्हेन्यू कोर्टातने अरविंद केजरीवाल आणि तत्कालीन आमदार गुलाब सिंह यांच्याविरोधात तक्रार दाखल करण्याचे आदेश पोलिसांना दिले होते.

अनाधिकृत बॅनर कुणी लावले, याची चौकशी पोलिसांनी केली नाही, असे ताशेरे कोर्टाने ओढले आहेत. 18 मार्चपर्यंत याबाबतचा अहवाल देण्याची सूचना कोर्टाने दिली होती. यापूर्वी व्दारका सत्र न्यायालयाने याबाबतची याचिका फेटाळली होती.

पोलिसांच्या आपल्या रिपोर्टमध्ये असे म्हटले आहे की, रिपोर्ट दाखल करण्याच्या तारखेस नमूद केलेल्या ठिकाणी कोणतेही होर्डिंग किंवा बॅनर दिसले नाहीत. मात्र, तक्रारीच्या दिवशी बॅनर होर्डिंग्जच्या स्थितीबाबत पोलिसांनी मौन बाळगले आहे. अशा परिस्थितीत होर्डिंगचे बॅनर कोणी आणि का लावले याची चौकशी होणे गरजेचे आहे, असे अतिरिक्त मुख्य न्यायदंडाधिकारी नेहा मित्तल यांनी आपल्या आदेशात म्हटलं आहे.

पुरावा म्हणून दाखल करण्यात आलेल्या फोटोमध्ये होर्डिंग्ज आणि बॅनर तयार करणाऱ्या कंपनी किंवा संस्थेच्या नावाचा उल्लेख नाही, असा युक्तिवाद राज्य सरकारच्या वकिलांनी केला होता. न्यायालयाने तो फेटाळला. या प्रकरणाशी संबंधित व्यक्ती कोण आहेत, याची चौकशी होणे गरजेचे आहे, असे न्यायालयाने म्हटलं आहे.