Shivsena UBT : ऑपरेशन टायगरच्या चर्चांवरून ठाकरेंच्या खासदारांनी एकत्र येत शिंदे गटाला ठणकावलं, "टायगर जिंदा है..."

New Delhi News 07 Feb : "ठाकरेंची साथ सोडून शंभर टक्के आम्ही कुठेही जाणार नाही, आमची वज्रमूठ आहे, टायगर जिंदा है"; असं म्हणत खासदार अरविंद सावंत यांनी शिवसेनेचे 9 खासदार शिवसेना उद्धव बाळासाहेब ठाकरे पक्ष (Shivsena UBT) सोडून कुठेही जाणार नसल्याचं स्पष्ट केलं.

मागील अनेक दिवसांपासून ठाकरेंच्या शिवसेनेतील 6 आमदार उपमुख्यमंत्री एकनाथ शिंदेंच्या संपर्कात असून ते लवकरच उद्धव ठाकरेंची (Uddhav Thackeray) साथ सोडणार असल्याच्या चर्चा सुरू होत्या. या सर्व चर्चांना पूर्णविराम देण्यासाठी ठाकरेंच्या शिवसेनेच्या सर्व खासदारांनी दिल्लीत पत्रकार परिषद घेत आपली बाजू मांडली.

या पत्रकार परिषदेत बोलताना खासदार अरविंद सावंत (Arvind Sawant) म्हणाले, आज सकाळपासून जाणीवपूर्वक अशा बातम्या पसरवल्या जात आहेत. मात्र, ज्यांच्या पायाखालची वाळू सरकली आहे तेच या बातम्या पसरवत आहेत. सरकारमध्ये असून सुद्धा ते स्थिर नाहीत. या सर्व बातम्या येत असताना विषय वळवण्यासाठी या बातम्या सुरू केल्या आहेत.

तसंच आताही नऊ खासदार उपस्थित आहेत. रोज पुड्या सोडत असतात. पण टप्प्याटप्प्याने त्यांचीच माणसे तिकडे आमदार घेऊन जाणार आहेत, अशा बातम्या येत होत्या. या बातम्यांवरून लक्ष हटवण्यासाठी बातम्या पेरायचं काम सुरू आहे. मात्र, ठाकरेंजवळ निष्ठेने राहिलेल्या लोकांबाबत गैरसमज पसरवला जात आहे, याचा मी निषेध करतो, असं सावंत म्हणाले.

शिवाय आम्ही सगळे शिवसेना उद्धव बाळासाहेब ठाकरे पक्षासोबत आहे असंही सावंतांनी यावेळी स्पष्ट केलं. दरम्यान, खासदार फोडाफोडीच्या चर्चांवरून थेट देशाचे पंतप्रधान नरेंद्र मोदी यांच्यावर हल्लाबोल केला. तिकडे मणीपूर जळत आहे, अमेरिकेतून आपल्या नागरिकांना बेड्या ठोकून देशात आणलं जात आहे.

मात्र, हे डुबकी मारत आहेत आणि ती डुबकी पण दिल्लीत निवडणुका आहेत म्हणून मारत आहेत. त्यांचं हिंदुत्व केवळ सत्तेसाठी आहे, त्यांना हिंदुत्वाचं पण काही घेणंदेणं नाही, असं म्हणत सावंत यांनी मोदींवर हल्लाबोल केला.