Assembly Election 2023 : मते काँग्रेसला, सत्ता भाजपला; पाच राज्यांच्या निवडणुकांमध्ये घडलं तरी काय?

Assembly Election 2023 : लोकसभा निवडणुकीची सेमी फायनल भाजपने जिंकत बाजी मारली. पाच राज्याच्या विधानसभा निवडणुकीत मध्य प्रदेश, राजस्थान व छत्तीसगडमध्ये भाजपने काँग्रेसला आस्मान दाखविले, तर तेलंगणामध्ये काँग्रेसने बाजी मारली. या निवडणुकीत भाजपने विजय मिळवला असला तरी पाच राज्यांतील एकूण मते पाहता काँग्रेसने आघाडी घेतली आहे. मात्र, मतांमध्ये घेतलेली ही आघाडी काँग्रेसला विजयामध्ये परावर्तित करता आली नाही. (Congress lead in votes in five states assembly election)

पाच राज्यांत मिळालेले मतदान पाहता भाजपला 4 कोटी 81 लाख 68 हजार 987 एकूण मते मिळाली आहेत तर पाचही राज्यांत मिळून काँग्रेसला 4 कोटी 92 लाख 24 हजार 20 एकूण मते मिळाली. ही आकडेवारी पहिली तर काँग्रेसला भाजपपेक्षा 10 लाख 55 हजार 33 जास्त मते आहेत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मध्य प्रदेशात भाजपला 35 लाख मते जास्त

मध्य प्रदेशमधील विधानसभा निवडणुकीत 230 जागांपैकी भाजपला 163 तर काँग्रेसला 66 जागा मिळाल्या आहेत. भाजपला मिळालेली एकूण मते 2 कोटी 11 लाख 16 हजार 197 मिळाली. तर काँग्रेसला 1 कोटी 75 लाख 71 हजार 582 एकूण मते मिळाली. मध्य प्रदेशात भाजपला काँग्रेसपेक्षा 35 लाख 44 हजार 615 मते अधिक मिळाली.

राजस्थानमध्ये भाजपची आघाडी

राजस्थान विधानसभा निवडणुकीत भाजपला 1 कोटी 65 लाख 24 हजार 787 एकूण मते मिळाली तर काँग्रेसला 1 कोटी 56 लाख 67 हजार 947 एकूण मते मिळाली. राजस्थानमध्ये भाजपला काँग्रेसपेक्षा 8 लाख 56 हजार 840 मते जास्त आहेत. या ठिकाणी एकूण 199 जागांपैकी भाजपला 115 तर काँग्रेसला 69 जागा मिळाल्या आहेत.

छत्तीसगडमध्ये भाजप पुढे

छत्तीसगड विधानसभा निवडणुकीत 90 जागांपैकी भाजपला 54 तर काँग्रेसला 35 जागा मिळाल्या. याठिकाणी भाजपला 72 लाख 34 हजार 968 एकूण मते मिळाली तर काँग्रेसला 66 लाख 02 हजार 586 एकूण मते मिळाली. याठिकाणी भाजपला काँग्रेसपेक्षा 6 लाख 32 हजार 382 मते अधिक आहेत.

तेलंगणात काँग्रेसची आघाडी

तेलंगणा विधानसभा निवडणुकीत काँग्रेसने यश संपादन केले. 119 जागांपैकी भाजपला 8 तर काँग्रेसला 64 एवढ्या जागा मिळाल्या आहेत. याठिकाणी भाजपला 32 लाख 57 हजार 511 एकूण मते मिळाली तर त्या तुलनेत काँग्रेसला 92 लाख 35 हजार 792 इतकी एकूण मते मिळाली. तेलंगणमध्ये काँग्रेसला भाजपपेक्षा 59 लाख 78 हजार 281 मते अधिक मिळाली आहेत.

मिझोरममध्येही मतांमध्ये काँग्रेसची बाजी

मिझोरम विधानसभा निवडणुकीत भाजपला 35 हजार 524 एकूण मते मिळाली तर काँग्रेसला 1 लाख 46 हजार 113 एकूण मते मिळाली. मिझोरममध्ये काँग्रेसला भाजपपेक्षा 1 लाख 10 हजार 589 मते जास्त आहेत. या ठिकाणी एकूण 40 जागांपैकी भाजपला 2 तर काँग्रेसला 1 जागा मिळाली आहे.