ममता बॅनर्जी मुख्यमंत्री राहणार का? आजच्या निकालाकडे लक्ष

नवी दिल्ली : पश्चिम बंगालच्या मुख्यमंत्री पदी ममता बॅनर्जी कायम राहणार की नाही. याबाबत आज निर्णय होणार आहे. भोवानीपूर (Bhowanipur) पोटनिवडणुकीचा निकाल आज जाहीर होणार आहे. मुख्यमंत्री पदी राहण्यासाठी ममता बॅनर्जी (Mamata Banerjee) यांच्यासाठी या जागेवर विजय महत्वाचे आहे. भाजपच्या प्रियांका तिब्रेवाल यांनी त्यांना कडवी लढत दिल्याचे बोलले जात आहे.

भोवानीपूर विधानसभा पोटनिवडणुकीसाठी आज मतमोजणी कडेकोट बंदोबस्तात सुरु आहे. भवानीपूर व्यतिरिक्त, शमशेरगंज आणि जंगीपूर विधानसभा जागांच्या पोटनिवडणुकांचे निकालही जाहीर होणार आहे. नंदीग्राम मतदारसंघातून विधानसभा निवडणूक हरल्यानंतर बॅनर्जी या जागेवरून निवडणूक लढवली आहे.

भोवानीपूर विधानसभेच्या पोटनिवडणुकीसाठी ३० सप्टेंबर रोजी मतदान झाले. त्यानंतर आता सर्वांच्या नजरा आज येणाऱ्या निकालाकडे लागल्या आहेत. सकाळी ८ वाजल्यापासून मतमोजणी सुरू झाली आहे. दरम्यान कडक सुरक्षा व्यवस्था करण्यात आली आहे. भोवानीपूर मतदारसंघात ५७ टक्क्यांहून अधिक मतदान झाले आहे. भवानीपूर कोलकात्यातील विधानसभा मतदारसंघ आहे आणि तो तृणमूल काँग्रेसचा बालेकिल्ला मानला जातो.

ममता बॅनर्जी २०१६ मध्ये या जागेवरून विजयी झाल्या होत्या. त्यामुळे यावेळी त्या जिंकतील अशी त्यांना आशा आहे. तृणमूलच्या अनेक नेत्यांनी या जागेवर ममता बॅनर्जी यांचा विजय आधीच मान्य केला. तृणमूलसोबतच भाजपनेही आपल्या विजयाचे दावा केला आहे. भाजपने ममतांच्या विरोधात प्रियांका तिब्रेवाल यांना उमेदवारी दिली आहे. भाजपचे राष्ट्रीय उपाध्यक्ष आणि पक्षाचे माजी प्रदेशाध्यक्ष दिलीप घोष म्हणाले की, भवानीपूरमध्ये भाजप खूप चांगली लढत देईल. त्यांनी या जागेवर विजय मिळेल अशी आशा व्यक्त केली.