Sharad Pawar News : राष्ट्रवादी काँग्रेस (NCP) पक्षाला निवडणूक आयोगाने मोठा धक्का दिल्याची माहिती समोर येत आहे. राष्ट्रवादी काँग्रेसचा, राष्ट्रीय पक्षाचा दर्जा निवडणूक आयोगाने रद्द केला आहे. यामुळे पक्षाला मोठा धक्का बसला आहे. यामुळे आता राष्ट्रवादी स्थानीक पक्ष असणार आहे.
पक्षाने राष्ट्रीय पक्षाचे जे निकष होते, ते पूर्ण केले नाही, असे आयोगाने म्हटले आहे. राष्ट्रवादी काँग्रेस (NCP) पक्षाच्या 'राष्ट्रीय दर्जा'चा केंद्रीय निवडणूक आयोगाकडून फेरविचार करण्यात आला होता. त्यानंतर आयोगासमोर पक्षाच्या वतीने पटेल (Praful Patel) यांनी बाजू मांडली होती. त्यामध्ये त्यांनी सर्व कागद पत्रे सादर केली होती. त्यानंतर पक्षाच्या राष्ट्रीय दर्जाला कोणताही धोका नाही, असे राष्ट्रवादीच्या वतीने स्पष्ट करण्यात आले होते. मात्र, आता आयोगाने पक्षाचा दर्जा रद्द केला आहे.
केंद्रीय निवडणूक आयोगाकडून (Election Commission) जुलै २०१९ मध्येच देशातील इतर राष्ट्रीय पक्षांसोबत राष्ट्रवादी काँग्रेसला सुद्दा पत्र पाठवण्यात आले होते. त्यानंतर कोरोना असल्यामुळे त्या पत्रावर कार्यवाही झाली नव्हती. त्यामुळे त्या संदर्भात राष्ट्रवादीच्या नेत्यांनी आयोगाच्या अधिकाऱ्यांची भेट घेतली होती.
निवडणूक आयोगाच्यावतीने मायावती यांचा बसप, भारतीय कम्युनिस्ट पक्ष आणि तृणमूल काँग्रेस यांनाही 2019 मध्ये नोटीस बजावण्यात आली होती. त्या वर्षीचा लोकसभा निवडणुकीतील संबंधित पक्षाची कामगिरी पाहता राष्ट्रीय पक्षाचा दर्जा का काढून घेऊ नये, असा सवाल त्यामध्ये उपस्थित करण्यात आला होता. त्यानुसार, तृणमूल काँग्रेस आणि भारतीय कम्युनिस्ट पक्षाचाही राष्ट्रीय दर्जा आयोगाने काढून घेतला आहे.
सध्या राष्ट्रवादी काँग्रेस पाच खासदार आहेत. त्याच प्रमाणे अनेक राज्यात राष्ट्रवादीने निवडणुका लढवल्या आहेत. त्यामध्ये महाराष्ट्रात राष्ट्रवादी प्रमुख विरोधी पक्ष आहे. तसेच नागालँड, केरळ आणि झारखंड या राज्यात आमदार आहेत.
पक्षाला राष्ट्रीय दर्जा मिळण्याचे निकष काय असतात?
लोकसभा निवडणुकीत किमान ३ राज्यांमध्ये २ टक्के जागांवर विजय मिळवणे आवश्यक आहे. लोकसभेत किमान चार जागा आणि किमान सहा टक्के मते मिळाली पाहिजे. पक्षाला ४ किंवा अधिक राज्यांमध्ये प्रादेशिक पक्ष म्हणून मान्यता मिळणे आवश्यक आहे. किमान चार राज्यांमध्ये विधानसभा निवडणुकीत सहा टक्क्यांपेक्षा अधिक मते मिळणे गरजेचे असे. यातील एक निकष पूर्ण करणाऱ्या पक्षाला राष्ट्रीय पक्षाचा दर्जा मिळतो. राष्ट्रीय पक्षाचा दर्जा असला की पक्षाला देशभरात एकाच चिन्हावर निवडणूक लढवता येते. तसेच, राजधानी दिल्लीत पक्ष कार्यालयासाठी जागा मिळते. त्यामुळे, प्रत्येक पक्ष हा दर्जा टिकवण्यासाठी प्रयत्न करत असतो.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
