Prashant Kishor on Nitish Kumar : विधानसभा निवडणुकीनंतर नितीश कुमार..! प्रशांत किशोर यांची मोठी भविष्यवाणी

Patna : बिहारमध्ये पुढीलवर्षी विधानसभेची निवडणूक असल्याने सर्व पक्षांनी जोरदार तयारी सुरू केली आहे. लोकसभा निवडणुकीत मुख्यमंत्री नितीश कुमार यांच्या पक्षाला लॉटरी लागली. राज्यात 12 जागा मिळवत त्यांनी पुन्हा आपली ताकद दाखवून दिली.

आता विधानसभेच्या निवडणुकीतही नितीश कुमार एनडीएसोबत असतील. मात्र, राजकीय रणनीतीकार प्रशांत किशोर यांनी त्यांच्याशिवाय मोठं भाकित केलं आहे. विधानसभा निवडणुकीनंतर नितीश कुमार यांची कसलीच लायकी राहणार नाही, असा निशाणा त्यांनी साधला आहे.

लोकसभा निवडणुकीत भाजपला स्वबळावर बहुमत मिळाले असते तर नितीश कुमार यांना कधीच खुर्चीवर खाली खेचले असते, असेही प्रशांत किशोर यांनी म्हटले आहे. लोकसभा निवडणुकीपुर्वीच नितीश कुमार एनडीएसोबत गेले आहेत.

कोणतीही स्थिती असली तरी नितीश कुमार मुख्यमंत्रिपदाच्या खुर्चीवर बसलेले असतात. पण 2025 मध्ये जनता त्यांना अशाप्रकारे खुर्चीवरून खाली खेचेल की ते काही बोलण्याच्याही लायक राहणार नाहीत. त्यांची स्थिती सर्वात वाईट होईल, असं भाकित प्रशांत किशोर यांनी वर्तवलं आहे.

दरम्यान, लोकसभा निवडणुकीनंतर नितीश कुमार आणि चंद्राबाबू नायडू किंगमेकर ठरले आहेत. नितीश कुमार एनडीएतून बाहेर पडले तर एनडीएच्या केंद्रातील सरकारला धोका नसेल. मात्र, सरकारकडे काठावरचे बहुमत असेल. त्यामुळे भाजपकडून सध्यातरी नितीश कुमार यांच्यावर विश्वास दाखवण्यात आला आहे.

बिहारमधील भाजपचे काही नेते मात्र स्वबळावर निवडणूक लढण्याची भाषा बोलू लागले आहेत. त्यामुळे बिहारच्या राजकारणासाठी पुढील काही महिने महत्वाचे मानले जात आहेत. भाजप नितीश कुमार यांच्याच नेतृत्वाखाली निवडणूक लढणार की स्वबळाचा नारा देणार हे पाहणे महत्वाचे ठरणार आहे.