अखेर मुख्यमंत्री नितीशकुमार भाजपसमोर झुकले अन् विधानसभा अध्यक्ष जिंकले

पाटणा : कोणत्याही विधानसभेत दिसणार असे चित्र बिहारच्या विधानसभेत दिसून आले होते. सत्ताधारी संयुक्त जनता दल आणि भाजपमध्येच जुंपली होती. मुख्यमंत्री नितीशकुमार आणि विधानसभा अध्यक्ष विजयकुमार सिन्हा यांच्यात सभागृहातच जोरदार खडाजंगी झाली होती. अखेर नितीशकुमार यांनी भाजपसमोर झुकती भूमिका घेतली आहे. त्यांनी विधानसभा अध्यक्षांनी सांगितल्यानुसार निर्णय घेतला असून ते बॅकफूटवर गेल्याचे चित्र आहे.

बिहारचे (Bihar) मुख्यमंत्री नितीशकुमार (Nitish Kumar) हे 14 मार्चला थेट विधानसभा अध्यक्षांवरच भडकले. सभागृहात सर्वांसमोर नितीश यांनी अध्यक्षांना त्यांच्या मर्यादेची जाणीव करून दिली. विधानसभा अध्यक्ष विजयकुमार सिन्हा हे भाजपचे (BJP) आहेत. नितीश हे अध्यक्षांना झापत असताना भाजपचे मंत्री व आमदार मात्र, शांतपणे त्यांचे बोलणे ऐकत बसून होते. यामुळे सत्ताधारी संयुक्त जनता दल (JDU) आणि भाजपमधील दरी वाढल्याची समोर आले होते. यानंतर दोन्ही सत्ताधारी पक्षांमध्ये सभागृहाबाहेर जुंपली होती. अखेर मुख्यमंत्र्यांनी या प्रकरणी नमती भूमिका घेतली आहे.

विधानसभा अध्यक्ष सिन्हा यांचा मतदारसंघ लखीसराय आहे. त्यांच्या मतदारसंघात मागील काही दिवसांपासून वेगवेगळ्या घटनांमध्ये नऊ जणांची हत्या झाली होती. या प्रकरणावरून सगळा राजकीय गदारोळ सुरू आहे. लखीसराच्या पोलीस अधीक्षकांची बदली करावी, या मागणीवर सिन्हा हे अडून बसले होते. अखेर नितीशकुमार हे भाजपच्या दबावासमोर झुकले आहेत. त्यांनी लखीसरायचे पोलीस अधीक्षक रंजन कुमार यांची उचलबांगडी करण्यात आली आहे. त्यांच्या जागी सय्यद इमरा मसूद हे नवीन पोलीस अधीक्षक आले आहेत. या सर्व प्रकरणामुळे सरकारमधील दोन पक्षांतीत मतभेद चव्हाट्यावर आले आहेत.

सभागृहात काय घडलं होतं?

लखीसराय प्रकरणावर सभागृहात मंत्री बिजेंद्र यादव उत्तर देत होते. या वेळी सभागृहाच्या कामकाजावर नाराजी व्यक्त करीत नितीशकुमार संतापले. त्यांचा राग अनावर झालेला पाहून सभागृहातील सत्ताधारी व विरोधकही हैराण झाले होते. नितीशकुमार यांचा संताप पाहून अध्यक्षांसह भाजपचे आमदारही गप्पगार पडले होते. ते अध्यक्षांना उद्देशून म्हणाले होते की, तुम्ही ज्या पद्धतीने कामकाज हाताळत आहात, ते मला पटलेले नाही. सभागृहात घटनेनुसार कामकाज अपेक्षित असते. परंपरांकडे काणाडोळा केला जाताना दिसत आहे.