BJP news : माजी मुख्यमंत्री भाजपला रामराम ठोकणार? मातब्बर नेत्याचे नाव घेत काँग्रेसने वाढविले टेन्शन

तामिळनाडू भाजपचे माजी प्रदेशाध्यक्ष के. अण्णामलाई हे पक्षाला रामराम ठोकणार असल्याची चर्चा सुरू असतानाच आता पंजाबमधून भाजपला धक्का देणारी बातमी समोर आली आहे. आगामी विधानसभा निवडणुकीच्या तोंडावर भाजपला मोठा झटका बसू शकतो.

मागील विधानसभा निवडणुकीत दारूण पराभवाचा सामना करावा लागलेल्या काँग्रेसने पुन्हा एकदा पंजाबमध्ये जोरदार तयारी सुरू केली आहे. राज्याचे माजी मुख्यमंत्री व मातब्बर नेते कॅप्टन अमरिंदर सिंग यांच्या घरवापसीसाठी काँग्रेस प्रयत्नशील असल्याचे संकेत मिळू लागले आहेत.

अमरिंदर सिंग यांनी काँग्रेसमधून बाहेर पडल्यानंतर सुरूवातीला स्वत:चा पक्ष स्थापन केला होता. त्यानंतर त्यांनी हा पक्ष भाजपमध्ये विलीन केला. पण तिथेही त्यांना अपक्ष यश मिळाले नाही. आपच्या त्सुनामीपुढे त्यांनाही पराभवचा धक्का सहन करावा लागला होता. ते पुन्हा काँग्रेसमध्ये परतल्यास पक्षाची ताकद वाढून सत्ताधारी आम आदमी पक्षासमोर आव्हान उभे करू शकतात.

हरियाणाचे माजी मुख्यमंत्री भूपेंद्र सिंह हुड्डा यांच्या एका विधानामुळे पंजाबमधील राजकीय हालचाली समोर आल्या आहे. अमरिंदर सिंग हे काँग्रेसच्या संपर्कात आहेत. ते काँग्रेसचे ज्येष्ठ नेते होते. त्यांचा पक्षाशी जुना संबंध असून आजही तो कायम आहे, असे सांगत हुड्डा यांनी खळबळ उडवून दिली आहे.

अमरिंदर यांनी भाजपच्या नव्या प्रदेशाध्यक्षांच्या नियुक्तीवरही उघडपणे नाराजी व्यक्त केल्यानंतर त्यांच्या घरवापसीच्या चर्चांना उधाण आले आहे. प्रदेशाध्यक्षांच्या पदग्रहण समारंभालाही ते गैरहजर होते. मागील काही महिन्यांत कॅप्टर अमरिंदर यांचा काँग्रेसच्या नेतृत्वाविषयीची भूमिका काहीशी मवाळ झाल्याचेही दिसून आले आहे. आपल्या भावाचे निधन झाल्यानंतर राहुल गांधी यांनी आपल्याला फोन केल्याचे सांगत अमरिंदर यांनी त्यांच्यासोबत असलेली भावनिक नात्याविषयी सूचक संकेत दिले होते.