Chandigarh Mayoral Polls : सरन्यायाधीश चंद्रचूड यांचा धसका? भाजपचे महापौर सोनकर राजीनामा देण्याची शक्यता

Chandigarh News : चंदीगड महापालिकेच्या महापौरपदाच्या निवडणुकीवरून सुरू असलेला वाद थांबण्याचे नाव घेत नाही. हे प्रकरण सुप्रीम कोर्टात पोहचले असून सोमवारी सुनावणी आहे. त्याआधी भाजपचे महापौर मनोज सोनकर राजीनामा देण्याची शक्यता व्यक्त केली जात आहे. सुप्रीम कोर्टाकडून निवडणूक पुन्हा घेण्याचे आदेश दिले जाऊ शकतात. (Chandigarh Mayoral Polls)

चंदीगड महापौरपदासाठी 30 जानेवारीला झालेल्या निवडणुकीत सोनकर यांचा विजय झाला होता. मात्र, या निवडणुकीत आप (AAP) आणि काँग्रेस आघाडीच्या आठ नगरसेवकांचे मतदान अवैध ठरवण्यात आल्याने मोठा गोंधळ निर्माण झाला होता. निवडणूक अधिकाऱ्यांनी मतपत्रिकेत खाडाखोड केल्याचा आरोप आघाडीकडून करण्यात आला. तसेच त्याचे व्हिडिओही व्हायरल करण्यात आले.

निवडणुकीत झालेल्या गोंधळानंतर नगरसेवक कुलदीप कुमार यांनी निवडणूक प्रक्रिया पुन्हा घेण्याची मागणी करणारी याचिका सुप्रीम कोर्टात (Supreme Court) दाखल करण्यात आली आहे. त्यावर काही दिवसांपुर्वीच झालेल्या सुनावणीवेळी सरन्यायाधीश धनंजय चंद्रचूड (Dhananjay Chandrachud) यांनी निवडणूक अधिकाऱ्यांवर ताशेरे ओढले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

सरन्यायाधीश म्हणाले होते की, निवडणूक अधिकारी अशाप्रकारे निवडणूक कशी घेऊ शकतात? अशी अधिकाऱ्यांची वागणूक असते? ही लोकशाहीची थट्टा आहे. लोकशाहीची हत्या आहे. हे पाहून आम्ही हैराण झालो. या व्यक्तीवर कारवाई व्हायला पाहिजे, अशी नाराजी चंद्रचूड यांनी व्यक्त केली होती. तसेच पुढील सुनावणीपर्यंत चंदीगड महापालिकेची बैठक घेण्यासही न्यायालयाने मनाई केली आहे. त्यामुळे सोमवारी होणाऱ्या सुनावणीकडे सर्वांचे लक्ष लागले आहे. त्यामुळे सोनकर त्याआधीच राजीनाम देऊ शकतात.

दरम्यान, निवडणुकीमध्ये आघाडीकडे 20 मते होती. या निवडणुकीत भाजपचा पराभव होणार, हे निश्चित मानले जात होते. आघाडीच्या सर्व नगरसेवकांनी मतदानही केले. पण निवडणूक अधिकाऱ्यांनी त्यापैकी आठ मते अवैध ठरवली. त्यामुळे आघाडीला केवळ बारा मते मिळाली. परिणामी भाजपचा उमेदवार 16 मते मिळाल्याने विजयी घोषित करण्यात आला.

आपचे तीन नगरसेवक संपर्कात?

आपचे तीन नगरसेवक भाजपच्या संपर्कात असल्याची चर्चा आहे. सुप्रीम कोर्टाने पुन्हा निवडणूक घेण्याचे आदेश दिल्यास भाजपचाच उमेदवार निवडून आणण्यासाठी नेत्यांनी कंबर असल्याचे सांगितले जात आहे. आघाडीत बिघाडी करून नगरसेवकांना गळ टाकण्यात येत असल्याचे चर्चा आहे.