Prime Minister Narendra Modi and Rahul Gandhi Among Voters : देशात उपराष्ट्रपती पदाच्या निवडणुकीची चर्चा सुरू असताना सध्या बहुतेक खासदारांचे लक्ष दुसऱ्याच निवडणुकीकडे लागले आहे. या निवडणुकीत भाजपचेच दोन मातब्बर नेते एकमेकांविरोधात उभे ठाकले आहेत. विशेष म्हणजे या निवडणुकीसाठी आत मतदान सुरू असून पंतप्रधान नरेंद्र मोदींसह लोकसभेतील विरोधी पक्षनेते राहुल गांधी तसेच सत्ताधारी, विरोधी पक्षांतील अनेक आजी-माजी खासदार मतदार आहेत.
निवडणुकीत कोण कुणाला मतदान करणार याबाबतची उत्सुकता शिगेला पोहचली आहे. ही निवडणूक आहे दिल्लीतील प्रतिष्ठित कॉन्स्टिट्यूशन क्लब ऑफ इंडियाच्या सचिवपदाची (प्रशासन). बिहारमधील भाजपचे मातब्बर नेते आणि माजी केंद्रीय मंत्री राजीव प्रताप रूडी आणि भाजपचे दुसरे नेते व माजी केंद्रीय मंत्री डॉ. संजीव बलियान यांच्यात ही लढत होणार आहे.
रूडी हे मागील दोन दशकांपासून या पदावर बिनविरोध निवडून येत आहेत. पण यावेळी बालियान यांनी त्यांच्यासमोर आव्हान उभे केले आहे. भाजपच्याच दोन मातब्बर नेत्यांमध्ये लढत होत असल्याने मतदान नेमके कुणाला करायचे, याबाबत भाजपसह इतर विरोधी पक्षातील आजी-माजी खासदारांमध्येही संभ्रम निर्माण झाला असेल. त्यामुळे या निवडणुकीत पक्षापेक्षा आता व्यक्तीला महत्व प्राप्त झाले आहे.
रूडी यांच्यासाठी ही लढत प्रतिष्ठेची बनली आहे. सचिव (क्रिडा), सचिव (सांस्कृतिक) आणि खजिनदार या पदासाठी बिनविरोध निवडणूक झाली आहे. या पदांवर अनुक्रमे काँग्रेसचे राजीव शुक्ला, डीएमकेचे तिरूची शिवा आणि भारत राष्ट्र समितीचे एपी जितेंद्र रेड्डी यांची निवड झाली आहे. क्लबचे अध्यक्ष लोकसभेचे सभापती ओम बिर्ला आहेत. मात्र सचिव (प्रशासन) हे पद महत्वाचे मानले जाते. सर्व कारभार सचिव पाहत असल्याने आज होणाऱ्या मतदानाबाबत उत्सुकता वाढली आहे.
रूडी यांनी दोन दशकांपूर्वी याच निवडणुकीत माजी राष्ट्रपती रामनाथ कोविंद यांचा पराभव केला होता. विरोधी पक्षातील बहुतेक खासदारांचा रूडी यांना पाठिंबा असल्याची चर्चा आहे. तर भाजपमधील आजी-माजी खासदारांचा मोठा गट बालियान यांच्यामागे उभा असल्याची चर्चा आहे. आज दुपारी चार वाजेपर्यंत मतदान सुरू राहणार आहे. त्यानंतर आजच मतमोजणीही होईल.
निवडणुकीसाठी 1200 हून अधिक मतदार असले तर मतदानाची टक्केवारी अत्यल्प असते. जेमतेम 100 मतदान होते. मात्र, यावेळी हे मतदान 500 पर्यंत जाण्याची शक्यता आहे. पंतप्रधान, गृहमंत्री विरोधी पक्षनेत्यांसह इतर हायप्रोफाईल मतदार मतदान करणार की नाही, याकडेही लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.