Vivek Bhagat: जंतर-मंतरवरील आंदोलनात विनयभंगाचा आरोप; पोलीस अधिकाऱ्याला DCPपदी बढती; दिल्ली पोलिसांनी दिलं स्पष्टीकरण

Vivek Bhagat: मुख्य निवडणूक आयुक्त ज्ञानेश कुमार यांच्या विरोधात ३ ऑक्टोबर रोजी जंतरमंतरवर सुरू असलेल्या आंदोलनादरम्यान एका महिला पत्रकाराचा विनयभंग केल्याचा आरोप झालेल्या एका पोलीस अधिकाऱ्याला बढती मिळाली आहे. पण ही पदोन्नती अधिकाऱ्यांसाठीच्या नियमित आणि कालमर्यादित पदोन्नती प्रक्रियेचाच एक भाग असल्याचं सांगितलं जात आहे. भगत यांच्यासोबतच 'डॅनिप्स' (DANIPS) सेवेतील इतर ११ अधिकाऱ्यांनाही पदोन्नती मिळाली आहे, तर त्यांच्याच तुकडीतील इतर तीन अधिकाऱ्यांनाही अशीच पदोन्नती देण्यात आली आहे.

या घडामोडीवर प्रतिक्रिया देताना 'कॉक्रोच जनता पार्टी'चे (CJP) संस्थापक अभिजीत दिपके यांनी प्रश्न उपस्थित केला की, "विनयभंग केल्याबद्दल त्या पोलीस अधिकाऱ्याला बक्षीस दिले जात आहे का?" जंतरमंतर येथील आंदोलनादरम्यान हा आरोप समोर आला होता. त्यावेळी घटनास्थळी तैनात असलेल्या पोलीस कर्मचाऱ्यांमध्ये भगत यांचाही समावेश होता.

३ ऑक्टोबर रोजी जंतरमंतर येथे मुख्य निवडणूक आयुक्त ज्ञानेश कुमार यांच्या विरोधात झालेल्या आंदोलनादरम्यान पोलीस कर्मचाऱ्यांनी आपला लैंगिक छळ केल्याचा आरोप तीन महिला पत्रकारांनी केला होता. दिल्ली पोलिसांनी सांगितले की, त्यांनी या तक्रारी निष्पक्ष चौकशीसाठी 'गुन्हे शाखेकडे' (Crime Branch) वर्ग केल्या आहेत आणि अद्याप कोणतीही एफआयआर (FIR) नोंदवण्यात आलेली नाही. गुन्हे शाखा या आरोपांची तपासणी करेल आणि चौकशीचा भाग म्हणून तक्रारदार व इतर संबंधित व्यक्तींचे जबाब नोंदवेल, असे एका अधिकाऱ्याने 'पीटीआय' (PTI) या वृत्तसंस्थेला सांगितलं.

रविवारी सामाजिक कार्यकर्ते, विरोधी पक्षांचे नेते आणि 'कॉक्रोच जनता पार्टी'च्या सदस्यांनी एसीपी विवेक भगत यांच्यावर कारवाईची मागणी करत संसद मार्ग पोलीस ठाण्याबाहेर ठिय्या आंदोलन केलं होतं. मार्क्सवादी कम्युनिस्ट पार्टीनं याप्रकरणाच्या तक्रारीसंदर्भात सांगितलं की, वृंदा करात आणि आयशी घोष यांच्यासह पक्षाच्या नेत्यांच्या एका शिष्टमंडळानं डीसीपींची भेट घेतली होती, डीसीपींनी यावेळी या विनयभंगाच्या घटनेचा व्हिडिओ पुरावा सादर करण्याची मागणी केली होती.