Donald Trump: डोनाल्ड ट्रम्प बनले बिहारचे रहिवासी! अमेरिकन राष्ट्राध्यक्षांच्या नावे आला अर्ज; प्रशासनं शॉकमध्ये

Donald Trump: बिहारमध्ये विधानसभा निवडणुकीच्या तोंडावर सध्या सुरु असलेल्या स्पेशल इन्टेन्सिव्ह रिव्ह्यूमुळं अर्थात मतदारयाद्या अपडेट करण्याचं काम सुरु आहे. यावरुन उलटसुलट चर्चा सुरु असताना तसंच आरोप-प्रत्यारोप होत असताना आणखी एक गंभीर आणि अजब प्रकार समोर आला आहे. अमेरिकेचे राष्ट्राध्यक्ष डोनाल्ड ट्रम्प यांच्या नावानं एका व्यक्तीनं मतदार अर्ज दाखल केला आहे. हा अर्ज प्राप्त झाल्यानं प्रशासनाचीही झोप उडाली. पण नेमकं काय घडलं?

बिहारच्या समस्तीपूर जिल्ह्यातील मोहिउद्दीननगर प्रखंड कार्यालयात हा प्रकार समोर आला आहे. यामुळं प्रशासनं गोंधळात बुचकाळ्यात पडलं आहे. कारण अमेरिकेचे राष्ट्राध्यक्ष डोनाल्ड ट्रम्प यांच्या फोटो आणि नावानं एका व्यक्तीनं रहिवासी दाखल्यासाठी ऑनलाईन अर्ज केला आहे. हा अर्ज आणि त्यावरील फोटो पाहिल्यानंतर प्रशासनाची झोप उडाली आणि त्यांनी याप्रकरणाची चौकशी सुरु केली. हा खोडसाळपणाचा प्रकार असल्याचं लक्षात येताच ट्रम्पच्या नावाचा अर्ज प्रशासनानं बाद केला. यानंतर आता सायबर कायद्यानुसार यामध्ये एफआयआर दाखल करण्याची प्रक्रिया सुरु करण्यात आली आहे.

अर्जाची पूर्ण घटना अशी

मोहिउद्दीननगरच्या लोकसेवा केंद्रात २९ जुलै २०२५ रोजी ऑनलाईन अर्ज (BRCCO/2025/17989735) रहिवाशी दाखल्यासाठी प्राप्त झाला. आश्चर्याची बाब म्हणजे यात अर्जदाराचं नाव डोनाल्ड जॉन ट्रम्प असं लिहिण्यात आलं होतं. या अर्जसोबत एक फोटोही जोडला होता, हो फोटो देखील डोनाल्ड ट्रम्प यांचाच होता. तर घराचा पत्ता म्हणून हसनपूर गाव, वॉर्ड क्रमांक १३, मुक्काम पोस्ट बाकरपूर, मोहिउद्दीननगर, जिल्हा. समस्तीपूर असा दिला आहे. त्याचबरोबर एक ई-मेल आयडी देखील यात आहे.

चौकशीत बनावट असल्याचं उघड

या अर्जाची ब्लॉक डेव्हलपमेंट अधिकारी डॉ. नवकंज कुमार आणि अंचलाधिकारी बृजेशकुमार द्विवेदी यांनी संयुक्त प्रेसनोट काढून याची संखोल चौकशी केली. चौकशीअंती हे समोर आलं की, फोटो, आधार क्रमांक, बारकोड आणि पत्त्यासोबत छेडछाड करण्यात आली आहे. हा अर्ज खोटा असल्याचं निष्पण्ण झालं. त्यानंतर ४ ऑगस्ट २०२५ रोजी महसूल अधिकारी सृष्टी सागर यांनी औपचारिकरित्या हा अर्ज फेटाळून लावला. अधिकाऱ्यांचं म्हणणं आहे की, सध्या बिहारमध्ये सुरु असलेल्या स्पेशल इन्टेन्सिव्ह रिव्ह्यूच्या कार्यक्रमात अडथळे आणण्यासाठी आणि याची खिल्ली उडवण्याचा हा प्रकार आहे.

जनतेला आवाहन

यानंतर प्रसासनानं सामान्य जनतेला आवाहन केलं आहे की, लोकसेवा केंद्रांचा आणि सरकारी पोर्टल्सचा अशा प्रकारे दुरुपयोग केला जाता कामा नये. अशा प्रकारचा खोडसाळपणा संसाधनाच्या नुकसानीला कारणीभूत ठरतात. तर गरजवंतांना यापासून वंचित राहावं लागतं. तसंच प्रशासनानं हे देखील स्पष्ट केलं आहे की, सरकारी सेवांमध्ये पारदर्शकता राखण्यासाठी तांत्रिकबाबींची पडताळणी अधिक सक्षम केली जाईल.