Kerala violence after ED raids : ईडी छाप्यानंतर हिंसाचार, पथकावर हल्ला; आठ जण अटकेत ३०० जणांविरुद्ध गुन्हा दाखल

ED raid on Pinarayi Vijayan residence News : माजी मुख्यमंत्री पिनराई विजयन यांच्या भाड्याच्या निवासस्थानी अंमलबजावणी संचालनालयाने (ईडी) छापा टाकल्यानंतर ईडी अधिकाऱ्यांच्या वाहनांवर झालेल्या हिंसक हल्ल्याप्रकरणी आतापर्यंत आठ जणांना अटक करण्यात आली आहे. तसेच तब्बल ३०० जणांविरुद्ध गुन्हा दाखल करण्यात आला आहे, अशी माहिती केरळचे पोलीस महासंचालक रवाडा ए चंद्रशेखर यांनी गुरुवारी दिली.

गृहमंत्री रमेश चेन्निथाला यांची भेट घेतल्यानंतर पत्रकारांशी बोलताना चंद्रशेखर यांनी सांगितले की, तपास योग्य दिशेने सुरू असून हिंसाचारात सहभागी आणखी काही जणांची ओळख पटली आहे. ईडीच्या छाप्याबाबत पोलिसांना पूर्वसूचना देण्यात आली नव्हती. मात्र कारवाई सुरू झाल्यानंतर सुरक्षेसाठी अतिरिक्त पोलीस बंदोबस्त तैनात करण्यात आला, असे त्यांनी स्पष्ट केले.

विजयन यांच्या निवासस्थानाजवळ विविध ठिकाणी पोलीस कर्मचारी तैनात करण्यात आले होते. या प्रकरणी केरळ पोलिसांनी सुमारे ३०० जणांविरुद्ध गुन्हे दाखल केले आहेत. भारतीय न्याय संहिता (बीएनएस) अंतर्गत बेकायदा जमाव जमविणे, दंगल, सरकारी कर्मचाऱ्यांवर हल्ला, अडथळा निर्माण करणे तसेच खुनाच्या प्रयत्नासारख्या गंभीर कलमांचा समावेश करण्यात आला आहे.

सार्वजनिक मालमत्तेचे नुकसान प्रतिबंधक कायद्यांतर्गतही गुन्हे दाखल करण्यात आले आहेत. एफआयआरनुसार, काही आंदोलकांनी ईडी पथकाशी संबंधित अधिकाऱ्यांवर काठ्यांनी हल्ला केला. तसेच वाहनांवर दगडफेक करण्यात आली, ज्यात एका वाहनचालकाला दुखापत झाली.

परिस्थिती नियंत्रणात आणण्याचा प्रयत्न करणाऱ्या केंद्रीय राखीव पोलीस दल (सीआरपीएफ) आणि केरळ पोलिसांवरही हल्ला करण्यात आल्याचा आरोप आहे. या हिंसाचारात अनेक अधिकारी जखमी झाले असून सरकारी वाहनांचे सुमारे तीन लाख रुपयांचे नुकसान झाल्याचे पोलिसांनी सांगितले.

ईडीची ही कारवाई विजयन यांच्या कन्या वीणा टी यांच्या कंपनी आणि एका वाळू उत्खनन कंपनीमधील आर्थिक व्यवहारांशी संबंधित कथित आर्थिक गैरव्यवहार प्रकरणाशी संबंधित असल्याचे अधिकाऱ्यांनी सांगितले. बुधवारी केरळमधील दहा ठिकाणी ईडीने छापे टाकले होते.