Gautam Adani : गौतम अदानींना सर्वात मोठा दिलासा! अमेरिकन कोर्टाकडून अखेर 'तो' खटला कायमचा बंद

Gautam Adani US Case : अदानी समूहाचे अध्यक्ष गौतम अदानी आणि त्यांचे पुतणे सागर अदानी यांच्याविरोधातील अमेरिकेतील फौजदारी खटला अखेर कायमचा बंद झाला आहे. न्यूयॉर्कच्या जिल्हा न्यायालयाने गौतम अदानी, सागर अदानी आणि ‘अदानी ग्रीन एनर्जी’चे माजी मुख्य कार्यकारी अधिकारी विनीत जैन यांच्यावरील आरोप फेटाळून लावले. त्यामुळे हे आरोप पुन्हा दाखल करता येणार नाहीत.

अमेरिकेच्या न्याय विभागाने फौजदारी आरोपपत्र मागे घेण्यासाठी केलेल्या अर्जाला जिल्हा न्या. निकोलस गारॉफिस यांनी मंजुरी दिली. मात्र, खटला मागे घेण्यामागील कारणांबाबत न्यायालयाने न्याय विभागाकडून अतिरिक्त स्पष्टीकरण मागविले होते. सरकारने दिलेली कारणे व आरोपींची शपथपत्रे तपासल्यावर न्यायालयाने खटला बंद करण्यास मंजुरी दिली.

प्रकरण काय?

प्रकरणाची सुरुवात नोव्हेंबर २०२४ मध्ये झाली होती. अमेरिकेच्या सरकारी वकिलांनी गौतम अदानी, सागर अदानी, विनीत जैन आणि अन्य व्यक्तींवर भारतातील सरकारी अधिकाऱ्यांना सुमारे २५ कोटी डॉलरची लाच देण्याचा कट रचल्याचा आरोप केला होता.

सौरऊर्जा प्रकल्पांची कंत्राटे मिळविण्यासाठी ही लाच देण्यात आल्याचा आरोप होता. मात्र, अदानी समूहाने सुरुवातीपासूनच हे आरोप फेटाळले होते. 'कायद्यावरील विश्वास कायम’ म्हणत या निकालाचे गौतम अदानी यांनी स्वागत केले.

'या निर्णयाकडे मी नम्रतेने आणि न्याय प्रक्रियेबद्दलच्या आदराने पाहतो. आमच्यावर, व्यवस्थेवर आणि भारताच्या न्यायक्षमतेवर विश्वास कायम ठेवणाऱ्या सर्वांचे मी मनापासून आभार मानतो", असे अदानी यांनी ‘एक्स’वरील पोस्टमध्ये नमूद केले.