BJP vice president candidate : कट्टर संघाचा माणूस उपराष्ट्रपतीपदावर होणार विराजमान? की PM मोदी पुन्हा 'जाट' कार्ड खेळणार? : दोन नावांनी वाढवला सस्पेन्स

New Delhi News : उपराष्ट्रपती पदाचा जगदीप धनखड यांनी महिनाभरापूर्वी अचानक राजीनामा दिला. त्यामुळे उपराष्ट्रपती पदासाठी निवडणूक जाहीर झाली आहे. या निवडणुकीसाठी सध्या अर्ज भरण्याची प्रक्रिया सुरु झाली असून 21 ऑगस्टपर्यंत उमेदवारी अर्ज दाखल करण्यात येणार आहेत. त्यासाठी आता भाजपप्रणित एनडीएकडून कोण उमेदवार असणार याची उत्सुकता शिगेला पोहचली आहे.

दुसरीकडे विरोधी पक्षाच्या इंडिया आघाडीचे नेतेदेखील उपराष्ट्रपतीपदाच्या उमेदवारावर चर्चा करण्यासाठी 18 ऑगस्टला भेटणार आहेत. भाजपच्या मित्रपक्षांनी उपराष्ट्रपतीपदाचा उमेदवार निवडण्याचे सर्वाधिकार पंतप्रधान नरेंद्र मोदी आणि भाजपचे राष्ट्रीय अध्यक्ष जे. पी. नड्डा यांना दिले आहेत. त्यामुळे कट्टर संघाचा माणूस उपराष्ट्रपतीपदावर विराजमान होणार की PM मोदी पुन्हा 'जाट' कार्ड खेळणार यामुळे सस्पेन्स वाढला आहे.

उपराष्ट्रपतीपदाच्या निवडणुकीसाठीचा कार्यक्रम निवडणूक आयोगाने जाहीर केला आहे. त्यामुळे आता वातावरण चांगलेच तापले आहे. उपराष्ट्रपतीपदासाठी 9 सप्टेंबरला मतदान होणार आहे आणि त्याच दिवशी मतमोजणीही होईल. अर्ज दाखल करण्याची शेवटची तारीख 21 ऑगस्ट आहे. उमेदवारी अर्ज दाखल करण्यासाठी सात दिवस शिल्लक राहिले आहेत. त्यामुळेच सत्ताधारी व विरोधी पक्षात वेगाने घडामोडी घडत आहेत. लोकसभा आणि राज्यसभेत भाजपकडे (BJP) स्पष्ट बहुमत असल्याने त्यांच्या उमेदवाराला निवडून येताना अडचण येणार नाही.

उपराष्ट्रपती पदासाठी या चार नावांची चर्चा

भाजपप्रणित एनडीएकडून उपराष्ट्रपती पदासाठी कर्नाटकचे राज्यपाल थावरचंद गेहलोत हे सर्वात प्रबळ दावेदार मानले जात आहेत. आणखी एक नाव सिक्कीमचे राज्यपाल ओम माथूर (Om Mathur) यांचेही आहे. संघाचे प्रचारक शेषाद्री चारी यांचे नाव स्पर्धेत आघाडीवर आहे. त्यानंतर गुजरातचे राज्यपाल आचार्य देवव्रत यांच्या नावाचीही चर्चा आहे. देवव्रत जाट समाजाचे आहेत. माजी उपराष्ट्रपती जगदीप धनखडदेखील जाट समाजाचे होते. त्यामुळे भाजप उपराष्ट्रपती पदासाठी पुन्हा 'जाट' कार्ड खेळणार? का याची उत्सुकता लागली आहे.

ओम माथुर :

सिक्कीमचे राज्यपाल ओम माथुर यांचे नाव स्पर्धेत आहे. 73 वर्षीय माथुर राजस्थानचे राज्यपाल आहेत. पंतप्रधान मोदी गुजरातचे मुख्यमंत्री असताना ते गुजरातचे निवडणूक प्रभारी होते. त्यांना मोदी तसेच केंद्रीय गृहमंत्री अमित शाह यांचे जवळचे मानले जाते. माथुर हे राष्ट्रीय स्वयंसेवक संघाचे प्रचारक आहेत.

थावरचंद गेहलोत :

त्याशिवाय या पदासाठी चर्चेत असलेले थावरचंद गेहलोत सध्या कर्नाटकचे राज्यपाल आहेत. 77 वर्षीय गेहलोत हे राज्यसभेत सभागृहाचे नेते राहिले आहेत आणि त्यांनी केंद्रीय मंत्रीपदही भूषवले आहे. ते भाजपमधील सर्वोच्च धोरण ठरवणारी संस्था असलेल्या संसदीय मंडळाचे सदस्य देखील राहिले आहेत. ते जातीय समीकरणात (दलित) देखील बसतात. ते मध्य प्रदेशातील आहेत. त्यांना प्रशासकीय अनुभव देखील आहे.

आचार्य देवव्रत :

गुजरातचे राज्यपाल आचार्य देवव्रत यांच्या नावाचीही या पदासाठी चर्चा आहे. देवव्रत जाट समाजाचे आहेत. माजी उपराष्ट्रपती जगदीप धनखडदेखील जाट समाजाचे होते. हरियाणाच्या समालखामधून येणारे आचार्य देवव्रत हिमाचल प्रदेशचे राज्यपाल राहिले आहेत. भाजपने जातीय समीकरणांवर लक्ष दिल्यास आचार्य देवव्रत यांच्या नावावर शिक्कामोर्तब होऊ शकतो.

शेषाद्री चारी :

या पदासाठी शेषाद्री चारी यांचे नाव आघाडीवर आहे. त्यांची ओळख कट्टर संघाचा माणूस अशी आहे. ते एक ज्येष्ठ पत्रकार, लेखक, राजकीय कार्यकर्ते आणि परराष्ट्र धोरण विश्लेषक आहेत. आरएसएसचे प्रखर विचारवंत असून सध्या भाजपच्या राष्ट्रीय कार्यकारिणी समितीचे सदस्य आहेत. त्यामुळे त्यांच्या नावाचा देखील विचार होऊ शकतो.