Middle East conflict latest news : मध्यपूर्वेतील संघर्षाने आता आणखी गंभीर वळण घेतले आहे. होर्मुझची सामुद्रधुनी पुन्हा खुली करण्यासाठी अमेरिकेने मध्यपूर्वेतून माघार घ्यावी, अशी थेट अट इराणने घातली आहे. अमेरिकेने माघार घेतली नाही, तर तिला या प्रदेशातून हाकलून लावू, असा इशाराही इराणच्या लष्कराच्या प्रवक्त्याने दिला आहे.
दरम्यान, होर्मुझच्या सामुद्रधुनीत व्यापारी जहाजांवरील हल्ल्यांचा धोका कायम असून, येमेनमध्येही हिंसक हल्ला झाल्याची माहिती समोर आली आहे. या घडामोडींमुळे मध्यपूर्वेतील सुरक्षेचा प्रश्न पुन्हा ऐरणीवर आला असून, त्याचे परिणाम जागतिक तेलबाजारावरही होऊ शकतात.
इराणच्या लष्कराचे प्रवक्ते मोहम्मद अक्रमिनिया यांनी शुक्रवारी सोशल मीडिया (Social Media) प्लॅटफॉर्म ‘एक्स’वर अमेरिकेला उद्देशून भूमिका मांडली. त्यांच्या म्हणण्यानुसार, अमेरिकेने मध्यपूर्वेतून माघार घेतल्यास होर्मुझची सामुद्रधुनी खुली केली जाईल. अन्यथा अमेरिकेला या प्रदेशातून बाहेर काढले जाईल. मात्र, ही सामुद्रधुनी प्रत्यक्षात कधी आणि कोणत्या अटींवर पूर्णपणे खुली होईल, याबाबत निश्चित माहिती देण्यात आलेली नाही.
पर्शियन आखातातून बाहेर पडणाऱ्या तेल आणि नैसर्गिक वायूच्या मोठ्या प्रमाणातील वाहतुकीसाठी होर्मुझची सामुद्रधुनी महत्त्वाची आहे. कच्च्या तेलाच्या किमती: पुरवठ्याबाबत अनिश्चितता वाढल्यास तेलाच्या किमतींत चढ-उतार होऊ शकतात. भारताच्या (India) इंधन आयातीचा खर्च वाढण्याची शक्यता निर्माण होऊ शकते. तेल महागल्यास वाहतूक, उत्पादन आणि इतर वस्तूंच्या किमतींवर परिणाम होऊ शकतो. जहाजवाहतुकीचा खर्च, सुरक्षा वाढवणे, मार्ग बदलणे किंवा विलंब होणे यामुळे देखील खर्च वाढू शकतो.
याशिवाय एका सागरी देखरेख संस्थेने होर्मुझच्या सामुद्रधुनीतून प्रवास करणाऱ्या जहाजांवरील हल्ल्यांचा धोका कायम असल्याचे सांगितले. जहाजांनी आपली हालचाल दर्शवणारी ट्रॅकिंग यंत्रणा बंद केली, तरीही त्यांच्यावर हल्ला होऊ शकतो, असे या संस्थेने नमूद केले.
मध्यपूर्वेतील हा तणाव केवळ इराण आणि अमेरिका यांच्यापुरता मर्यादित राहिलेला नाही. इराणचे समर्थन करणाऱ्या हुथी बंडखोरांनी गुरुवारी येमेनमधील सरकारच्या नियंत्रणाखालील प्रशासकीय राजधानी अदन येथील राष्ट्राध्यक्षांच्या राजवाड्यावर हल्ला केला. येमेनी सरकारच्या माहितीनुसार, या हल्ल्यात सुरक्षा कर्मचाऱ्यांचा मृत्यू झाला असून अनेक जण जखमी झाले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.