Government officials controversy : विश्वास नांगरे पाटलांवरून वाद सुरू असतानाच भाजपच्या बड्या नेत्याचं विधान चर्चेत; म्हणाले, भाजप सत्तेत आल्यानंतर अधिकारी RSS...

RSS controversy : महाराष्ट्रातील IPS अधिकारी विश्वास नांगरे पाटील यांचा एक व्हिडिओ पोस्ट करत काँग्रेसने त्यांच्यावर टीका केली होती. नांगरे पाटील यांच्याकडून आरएसएसचे कौतुक केल्याचा दावा काँग्रेसने केला आहे. त्यावरून राजकीय आरोप-प्रत्यारोप सुरू आहेत. त्यात भाजपच्या बड्या नेत्यानं शासकीय अधिकाऱ्यांबाबत वादग्रस्त विधान केले आहे.

मध्य प्रदेश सरकारमधील मंत्री कैलाश विजयवर्गीय यांनी शुक्रवारी एका कार्यक्रमात बोलताना वाद ओढवून घेतला आहे. राज्यात भाजप सत्तेत आल्यानंतर प्रशासकीय अधिकाऱ्यांमध्ये राष्ट्रीय स्वयंसेवक संघाशी (RSS) आपली जवळीक दाखवण्यासाठी स्पर्धा सुरू आहे, असा दावा विजयवर्गीय यांनी केला आहे. त्यावर आता काँग्रेसकडूनही पलटवार करण्यात आला आहे.

काय म्हणाले विजयवर्गीय?

विजयवर्गीय यांचा एका अधिकाऱ्याशी बोलताना व्हिडिओ समोर आला आहे. ते म्हणतात, RSS शी संबंध असल्याचे दाखवण्याची एक प्रकारची स्पर्धा सुरू झाली आहे. पण संघटनेत आता खूपच गर्दी झाली आहे आणि चांगल्या लोकांची कमतरता जाणवत असल्याचेही विजयवर्गीय म्हणाले.

'आमची सत्ता आल्यानंतर एक अधिकारी माझ्याकडे आला आणि म्हणाला, मी शाखेत जायचो. मी त्यांना म्हटलं, आमचे सरकार येण्यापूर्वी हे कधी सांगितले नाही,' हा किस्सा सांगतच विजयवर्गीय यांनी प्रत्येक अधिकारी संघाशी आपला संबंध दाखवण्याचा प्रयत्न करत असल्याचा दावा केला. आमची सरकार आल्यानंतर सगळेच आरएसएसमध्ये गेले, असेही विजयवर्गीय म्हणाले.

विजयवर्गीय यांच्या या विधानावर मध्य प्रदेश काँग्रेसचे प्रदेशाध्यक्ष जितू पटवारी यांनी टीका केली आहे. व्हिडिओ पोस्ट करत पटवारी यांनी म्हटले आहे की, सार्वजिनिक व्यासपीठावर असे वक्तव्य करणे म्हणजे गंभीर घटनात्मक प्रश्न निर्माण करणारे आहे. राष्ट्रपती आणि राज्यपालांनी याची दखल घेण्याचे आवाहनही पटवारी यांनी केले आहे. भारतीय घटनेनुसार, प्रत्येक सरकारी अधिकारी हा केवळ संविधानाशी निष्ठावंत असला पाहिजे, कोणत्याही राजकीय पक्षाशी किंवा विचारधारात्मक संघटनेशी नव्हे, असेही पटवारी म्हणाले आहे.