गृहमंत्री म्हणाले, बजरंग दलाच्या कार्यकर्त्याची हत्या हिजाब बंदीमुळे नव्हे तर...

बंगळूर : कर्नाटकात (Karnataka) हिजाबवरून (Hijab) वाद पेटला असून, यावरून राज्यात कायदा व सुव्यवस्थेचा प्रश्न निर्माण झाला आहे. यातच आता शिमोग्यात (Shivmogga) बजरंग दलाच्या (Bajrang Dal) कार्यकर्त्याची हत्या झाल्याने खळबळ उडाली आहे. याचा संबंध हिजाब बंदीशी जोडला जात होता. अखेर कर्नाटकचे गृहमंत्र्यांनी; या प्रकरणी खुलासा करीत या वादावर पडदा टाकला आहे. दरम्यान, शिमोग्यात जमावबंदी लागू करण्यात आली आहे.

ही हत्या मुस्लिम गुंडांनी केल्याचा खळबळजनक आरोप भाजपचे ज्येष्ठ नेते व ग्रामविकासमंत्री ईश्वरप्पा यांनी केला आहे. यावर गृहमंत्री अरग जनेंद्र यांनी बजरंग दलाच्या कार्यकर्त्याच्या हत्येचा हिजाब प्रकरणाशी कोणताही संबंध नसल्याचे स्पष्ट केले आहे. आतापर्यंत तरी हिजाब प्रकरणाचे या हत्येशी संबंध असल्याचे समोर आलेले नाही. ही घटना वेगळ्या कारणासाठी घडली आहे, असे गृहमंत्र्यांनी सांगितले. पोलिसांना तपासात धागेदोरे मिळाले असून, या प्रकरणातील दोषींनी पोलीस लवकरच अटक करतील. कायदा व सुव्यवस्था राखण्याचे निर्देश पोलिसांना दिले आहेत. लोकांनी शांत राहावे, असे मुख्यमंत्री बसवराज बोम्मई यांनी म्हटले आहे. (Bajrang Dal Activist Murder News)

हर्ष हा टेलर होता. त्याच्यावर चार जणांनी काल रात्री 9 वाजता हल्ला केला. त्याला तातडीने रुग्णालयात हलवण्यात आले. पण त्याचा जीव वाचू शकला नाही. या घटनेनंतर अज्ञात व्यक्तींनी अनेक वाहनांना आगी लागल्या. या प्रकरणाचा हिजाब वादाशी काहीही संबंध नसल्याचे पोलिसांचे म्हणणे आहे. हर्ष आणि एका टोळक्याची ओळख होती. पूर्ववैमनस्यातून त्याच्यावर हल्ला झाल्याचे पोलिसांनी स्पष्ट केले. हर्ष याची हत्या करणाऱ्यांना लवकरच पकडले जाईल, असेही पोलिसांनी म्हटले आहे.

बजरंग दलाच्या 26 वर्षीय हर्ष या कार्यकर्त्याची काल (ता.20) रात्री शस्त्राने भोसकून हत्या करण्यात आली. यानंतर शिमोग्यात तणावाचे वातावरण आहे. काही ठिकाणी जाळपोळ करण्यात आली. पोलिसांनी अनुचित प्रकार टाळण्यासाठी कडेकोट बंदोबस्त ठेवला आहे. याचबरोबर सार्वजनिक कार्यक्रमांवर बंदी घातली आहे. शाळा आणि महाविद्यालये बंद ठेवण्याचा निर्णय प्रशासनाने घेतला आहे. याचबरोबर जिल्हा प्रशासनाने जमावबंदी लागू केली आहे. जमावबंदी असतानाही हर्षचा मृतदेह घरी नेताना बजरंग दलाच्या कार्यकर्त्यांनी मोठा जमाव जमवला होता.