Bihar Election Result Effect : पराभवानंतर लालू प्रसाद यादवांचे घर देखील फुटले; मुलीने संबंध तोडले; दोघांवर खापर फोडले!

Rohini Acharya News : बिहार विधानसभा निवडणुकीच्या निकालानंतर लालू प्रसाद यादव यांचे घर देखील फुटले आहे. तेजस्वी यादव नेतृत्व करत असलेल्या आरजेडीला दारुण पराभव पत्करावा लागला. अवघ्या 25 जागांवर पक्षाने विजय मिळवला. दरम्यान, या पराभवानंतर अवघ्या दोन दिवसांत तेजस्वी यादव यांची मोठी बहीण रोहिणी आचार्य यांनी आपण कुटुंबासोबत सगळे संबंध संपवत असल्याचे जाहीर केले. तसेच राजकारणातून देखील बाहेर पडत असल्याचे सांगितले.

रोहिणी यांनी ट्विट करत म्हटले आहे की, 'मी राजकारण सोडत आहे आणि माझ्या कुटुंबाला दूर सारत आहे…हेच मला संजय यादव आणि रमीज यांनी करायला सांगितले होते… आणि आता मी सर्व दोष स्वतःवर घेत आहे.'

संजय यादव हे तेजस्वी यादव यांचे निकटवर्तीय म्हणून ओळखले जातात. त्यांच्यामुळेच कुटुंबात फूट पडत असल्याची टीका पूर्वी रोहिणी यांनी केली होती. तर, तेजप्रताप यादव यांनी देखील आरजेडीचा पराभव हा काही 'जयचंद' आहेत त्यांच्यामुळे झाला आहे. या पराभवामुळे ते खूश झाले असतील, अशी टीका केली.

रोहिणी आचार्य यांनी लालू प्रसाद यादव यांना आपली किडनी दिली होती. त्यावेळी त्या प्रसिद्धी झोतात आल्या होत्या. पुढे त्या पक्षात देखील सक्रिय होत्या. मात्र, काही लोक आपल्याला पक्षात सक्रीय राहू नका, असे सांगत असल्याचा आरोप त्यांनी केला होता. तेजस्वी यादव यांनी बिहारमध्ये यात्रा काढली होती तेव्हा त्यांच्या बसमधील जागेवर संजय यादव बसल्याचा फोटो ट्विट करत रोहिणी यांनी नाराजी व्यक्त केली होती.

तेजप्रताप यादव काय म्हणाले?

आरजेडीमधून तेजप्रताप यादव हे बाहेर पडून त्यांनी आपला पक्ष स्थापन केला होता. मात्र, त्यांना पराभवाचा धक्का सहन करावा लागला. तेजप्रताप यांनी पराभवानंतर आपल्या जनशक्ती जनता दल या पक्षाच्या अकाऊंटवरून पोस्ट करत म्हटले होते की, लोकांचा निकाल मी स्वीकारला आहे. मात्र, काही जयचदांमुळे आरजेडी आतून पोकळ झाली आहे. या लोकांनी पक्षाला बरबाद झाले. त्यांच्यामुळेच तेजस्वी फेलस्वी झाले.