BJP legal notice : भाजपकडून आमदारांना 20-30 कोटी, मंत्रिपदाची ऑफर..! विरोधी पक्षाने थेट मुख्यमंत्र्यांनाच अडकवलं कायद्याच्या कचाट्यात

India political news : मागील काही वर्षांपासून महाराष्ट्रात नगरसेवक, आमदार, खासदार फोडाफोडावरून सत्ताधारी आणि विरोधक नेहमीच आमनेसामने उभे ठाकतात. आमदारांना फोडण्यासाठी कोटींच्या ऑफर दिल्या जात असल्याचा आरोप विरोधकांकडून केला जातो. पण सत्ताधाऱ्यांकडून त्यावर पलटवार करत आरोप फेटाळले जातात. पण जम्मू-काश्मीरमधून मोठी घडामोड समोर आली आहे.

जम्मू-काश्मीरचे मुख्यमंत्री ओमर अब्दुल्ला यांनी नुकतेच भाजपवर गंभीर आरोप केले आहेत. श्रीनगरमध्ये दोन दिवसांपूर्वी एका कार्यक्रमात बोलताना अब्दुल्ला म्हणाले होते की, भाजपकडून नॅशनल कॉन्फरन्सच्या जम्मू भागातील आमदारांना फोडण्याचा प्रयत्न केला जात आहे. भाजपमध्ये येण्यासाठी त्यांना २० ते ३० कोटी रुपये आणि मंत्रि‍पदाची ऑफर दिली जात आहे.

केंद्रशासित प्रदेश असलेल्या जम्मू आणि काश्मीरला राज्याचा दर्जा बहाल करण्याचे आश्वासनही या आमदारांना दिले जात असल्याचा आरोप अब्दुल्ला यांनी केला होता. सुप्रीम कोर्टात वकील असलेल्या भाजपमधील वरिष्ठ नेत्याने आमदारांना लाच देण्याचा प्रयत्न केल्याचेही अब्दुल्ला यांनी म्हटले होते.

अब्दुल्ला यांच्या या आरोपांनंतर भाजपचे प्रदेशाध्यक्ष व राज्यसभेचे खासदार सतपाल शर्मा यांनी त्यांना कायदेशीर नोटीस बजावली आहे. या चुकीच्या आरोपांमुळे पक्षाची बदनामी झाली आहे. आरोपांना कोणताही आधार नाही. हे आरोप पुढील सात दिवसांत मागे घेत सार्वजनिक माफी मागावी, असे नोटिशीत म्हटले आहे. माफी न मागितल्यास फौजदारी खटल्यासोबतच मानहानीचा खटला दाखल करण्याचा इशाराही देण्यात आला आहे.

दरम्यान, राज्यात सध्या नॅशनल कॉन्फरन्स आणि काँग्रेसची सत्ता आहे. प्रामुख्याने जम्मू भागात भाजपचे आमदार मोठ्या संख्येने विजयी झाले आहेत. त्याच भागाताली सत्ताधारी आमदारांना भाजपकडून ऑफर दिली जात असल्याचा आरोप अब्दुल्ला यांनी केला आहे. विशेष म्हणजे ते येत्या २० जुलैपासून जम्मू-काश्मीरला राज्याचा दर्जा देण्याबाबतच्या मागणीसाठी दिल्लीत जंतरमंतरवर आंदोलन सुरू करणार आहेत.