प्रशांत किशोर यांच्या कंपनीवर गोवा पोलिसांचे छापे : कर्मचारी अटकेत

पणजी : निवडणूक रणनितीकार प्रशांत किशोर (Prashant Kishor) यांच्या I-PAC कंपनीवर गोवा पोलिसांनी (Goa Police) छापे टाकले आहेत. कारवाई दरम्यान पोलिसांनी कंपनीच्या कर्मचाऱ्याकडून गांजा जप्त केला असून संबंधित कर्मचाऱ्याला पर्वरी शहरातून अटक केली आहे. अटक करण्यात आलेल्या कर्मचाऱ्याचे वय २८ आहे. पोलिसांनी त्याच्यावर एनडीपीएस कायद्यान्वये गुन्हा दाखल केला आहे. गोवा पोलिसांनी शुक्रवारी पर्वरीमधील अनेक बंगल्यांवर छापे टाकले. या ठिकाणी I-PAC कंपनीने ८ बंगले भाड्याने घेतले आहेत.

गेल्या अडीच वर्षांपासून तृणमूल कॉंग्रेससाठी (TMC) काम करणारे प्रशांत किशोर गोव्यात पक्षाचे निवडणुकीसाठी काम सांभाळत आहेत. गोव्यात १४ फेब्रुवारीला मतदान होणार आहे. मात्र त्यापुर्वीच त्यांच्या कंपनीवर छापा पडला असून त्यात अंमली पदार्थ जप्त करण्यात आले आहेत. त्यामुळे ऐन निवडणुकीच्या तोंडावर प्रशांत किशोर आणि ममता बॅनर्जी यांच्यासमोर अडचणी उभ्या राहिल्या आहेत.

प्रशांत किशोर यांची I-PAC कंपनी निवडणूक व्यवस्थापनाचे काम करते. यापूर्वी २०१४ साली भाजपसाठी काम केल्यानंतर प्रशांत किशोर पहिल्यांदा चर्चेत आले होते. त्यानंतरच्या काळात भाजपपासून लांब जात त्यांनी जनता दल (संयुक्त) पक्षातून प्रत्यक्ष राजकारणात एन्ट्री घेतली होती. पुढे जनता दल (संयुक्त) आणि नितीशकुमारांचा हात सोडून त्यांनी राजकारणाला रामराम केला होता.

मात्र पश्चिम बंगाल निवडणुकीच्या तोंडावर त्यांनी तृणमूल काँग्रेसचा हात धरला होता. ते मागच्या तब्बल २.५ वर्षांपासून ममता बॅनर्जी आणि तृणमूल काँग्रेससाठी काम करत आहेत. पण मागच्या काही दिवसांपूर्वीपासून प्रशांत किशोर आणि तृणमूल काँग्रेस यांच्यातील संबंध बिघडले असल्याच्याही बातम्या येत आहेत. आगामी महापालिका निवडणुकांच्या तिकीट वाटपावरून गोंधळ झाला आहे. या पार्श्वभूमीवर करार संपवण्याचा निर्णय घेण्यात आल्याच्या चर्चा समोर येत आहे.