Rajya Sabha Winter Session : सरकार बदलल्यानंतर कुणीही बाहेर दिसणार नाही! संजय सिंह यांनी राज्यसभेतच दिली धमकी

New Delhi : राज्यसभेत संविधानावरील चर्चेदरम्यान आम आदमी पक्षाचे खासदार संजय सिंह यांनी जोरदार टोलेबाजी केली. संविधानवरील चर्चेदरम्यान ते बोलत असताना सत्ताधारी सदस्यांमधून जेल असा आवाज आला. त्यावर संजय सिंह यांचा पारा चढला आणि त्यांनी केंद्रात सत्ता बदल झाल्यानंतर आता सत्तेत असलेली एकही व्यक्ती बाहेर दिसणार नाही, असा इशारा दिला.

संजय सिंह यांनी संविधानावर बोलत असताना मंगळवारी हे विधान केले. इतर सदस्य बोलत असताना संजय सिंह यांनी त्यांचे बोलणे शांतपणे ऐकले. पण ते बोलत असताना काही सदस्यांनी जेल असे म्हणत त्यांना चुचकारण्याचा प्रयत्न केला. संजय सिंह हे काही महिन्यांपूर्वीच जेलमधून जामीनावर बाहेर आले आहेत.

सत्ताधारी सदस्यांना प्रत्युत्तर देताना संजय सिंह म्हणाले, ‘अशी धमकी देऊ नका. ज्या दिवसी सत्ता बदलेल त्यादिवशी सत्तेतील एकही व्यक्ती बाहेर दिसणार नाही.’ यावर भाजपचे राष्ट्रीय अध्यक्ष व सभागृह नेते जे. पी. नड्डा यांनी आक्षेप घेतला. त्यामुळे काही काळ राज्यसभेत गदारोळ निर्माण झाला होता.

दरम्यान, संविधानावरील चर्चेला आज केंद्रीय गृहमंत्री अमित शाह यांनी राज्यसभेत उत्तर दिले. संविधानावरून काँग्रेसवर टीका करताना शाह म्हणाले, ‘पक्षाला एका कुटुंबाची खासगी संपत्ती समजता, संविधानालाही तसेच समजत होता. संविधानासोबत कसा विश्वासघात केला, हे आज या चर्चेच्या माध्यमातून देशाला समजत आहे.’

शाह यांनी आणबाणीवरूनही काँग्रेसवर टीका केली. तसेच काँग्रेसने घटनेत केलेल्या दुरुस्त्यांवरूनही त्यांनी निशाणा साधला. त्यांनी काँग्रेसच्या चार घटनादुरुस्त्यांचे उदाहरण देताना अभिव्यक्ती स्वातंत्र्याचा मुद्दाही छेडला. तर मोदी सरकारच्या सहा घटनादुरुस्त्या सांगत त्यांनी सरकारने केवळ लोकांच्या हितासाठी हे बदल केल्याचेही स्पष्ट केले.