Sonia Gandhi on Anna Hazare movement : अण्णा हजारेंबाबत सोनिया गांधींचा मोठा दावा; विरोधकांचे खरे उद्दिष्ट साध्य होताच त्यांच्याबद्दल पुन्हा काहीही लिहिले गेले नाही..!

Sonia Gandhi autobiography news : काँग्रेस नेते सोनिया गांधी यांनी आपल्या आत्मचरित्रात अनेक महत्वाच्या घडामोडींवर प्रकाशझोत टाकला आहे. 'यूपीए-२' सरकारच्या काळात दिल्लीत मोठे आंदोलन झाले होते. या आंदोलनामुळेच देशात २०१४ मध्ये काँग्रेसची सत्ता आली नाही, असा दावा केला जातो. त्यावर सोनिया गांधी यांनी आत्मचरित्रात भाष्य केले.

अण्णा हजारे यांच्या आंदोलनाविषयी एकच परिच्छेद आहे. मात्र, त्यांनी हजारे यांचे आंदोलन हे सरकार उलथवून टाकण्यासाठीच होते, असे सूचक विधान केले आहे. या पुस्तकामध्ये आंदोलनाचे वर्ष २०१२ असे दिले आहे. प्रत्यक्षात २०११ मध्ये हे आंदोलन झाले होते. सोनिया गांधी यांनी महाराष्ट्रातील एक प्रसिध्द कार्यकर्ते बाबूराव "अण्णा" हजारे असा केला आहे.

अण्णा हजारे हे 'इंडिया अगेन्स्ट करप्शन' नावाच्या चळवळीचे नेतृत्व म्हणून पुढे आले. या चळवळीला गुप्तपणे भाजप आणि आरएसएसचे पाठबळ होते, हे नंतर चळवळीतील काही सहभागींनी म्हटले आहे. लोकपाल नियुक्त करण्याच्या मागणीसाठी हजारे यांना दिल्लीत मोठ्या थाटामाटात उपोषणासाठी आणण्यात आले. आंदोलनाला गर्दी जमली अन् भाजपच्या आक्रमक प्रचारासमोर आम्ही बचावात्मक पवित्र्यात आलो, असे सोनिया गांधी यांनी म्हटले आहे.

सोनिया गांधींनी पुढे म्हटले आहे की, २०१४ मध्ये आम्ही लोकपाल विधेयक आणले. या विधेयकामुळे केंद्रीय स्तरावरील लोकपाल आणि राज्यांमधील लोकायुक्तांना अधिकाऱ्यांवरील भ्रष्टाचाराच्या प्रकरणांची चौकशी करण्याचे अधिकार मिळाले. परंतु भाजपच्या काळात हे विधेयक विस्मृतीत गेले आहे. ते एका दात नसलेल्या वाघासारखे बनून राहिले आहे, अशी खंतही सोनिया गांधी यांनी व्यक्त केली आहे.

आमच्या विरोधकांनी सरकार उलथवून टाकण्याचे खरे उद्दिष्ट साध्य केल्यानंतर अण्णा हजारे यांच्याबद्दल पुन्हा काहीही ऐकू आले नाही किंवा त्यांच्याबद्दल लिहिले गेले नाही, असेही सोनिया गांधी म्हणाल्या आहेत. याचकाळात पडद्यामागे आरएसएस एका नवीन पंतप्रधानपदाच्या उमेदवारासाठी पायाभरणी करत होता, असा दावाही त्यांनी केला आहे. त्यानंतर नरेंद्र मोदी यांना राष्ट्रीय राजकारणात प्रवेश झाल्याचेही सोनिया गांधी म्हणाल्या आहेत.