DMK Congress Alliance update : तमिळनाडूमध्ये पुढील काही महिन्यांवर विधानसभेची निवडणूक आली आहे. त्याआधी सर्वच पक्षांमधील राजकीय वाटाघाटींना आता वेग येऊ लागला आहे. सत्ताधाऱी डीएमके आणि काँग्रेस आघाडी, अण्णाद्रमुक व भाजप आणि टीव्हीके अशी तिहेरी लढत होण्याची शक्यता व्यक्त केली जात आहे. मात्र, आगामी काळात वेगळीच राजकीय समीकरणे दिसण्याचे संकेतही मिळू लागले आहेत.
विधानसभा निवडणुकीसाठी द्रमुक आणि काँग्रेसमध्ये जागावाटपाच्या चर्चा सुरू झाल्याचे सांगितले जात आहेत. काँग्रेसने राज्यात ४० जागांची मागणी केली आहे. मात्र, द्रमुक एवढ्या जागा द्यायला तयार नसल्याचे चित्र आहे. काँग्रेसला केवळ ३२ जागांची ऑफर मिळाली आहे. त्यानंतर काँग्रेसने ३८ जागांपर्यंत खाली येण्याची तयारी दर्शविली. पण द्रमुकला ३२ वरून खाली येण्यास तयार नाही.
काँग्रेसने केवळ वाढीव जागाच नाही तर सत्तेतही मोठा वाटा मागितल्याचे सांगितले जात आहे. पक्षाचे खासदार मनिकम टागोर यांनी सोमवारी मीडियाशी बोलताना यावर भाष्य केले आहे. निवडणुकीआधी द्रमुकवर दबाव टाकण्याचा हा प्रयत्न असल्याची चर्चा आहे. मात्र, दुसरीकडे सध्या तमिळनाडूच्या राजकारणात नव्याने उदय झालेल्या प्रसिध्द अभिनेते विजय यांच्या पक्षाच्या भूमिकेने खळबळ उडाली आहे.
विजय यांच्या टीव्हीके पक्षाकडून आगामी विधानसभा निवडणुकीसाठी शड्डू ठोकला आहे. विजय यांच्याकडून ठिकठिकाणी सभा घेत वातावरणनिर्मिती केली जात आहे. त्यांना मोठा प्रतिसादही मिळत आहे. या घडामोडी घडत असतानाच पक्षाचे प्रवक्ते फेलिक्स गेराल्ड यांनी काँग्रेससोबत आघाडीचे मोठे संकेत दिले आहेत.
विजय आणि राहुल गांधी हे चांगले मित्र आहेत. काँग्रेससोबत आघाडीची शक्यता अधिक आहे. मात्र, तमिळनाडू काँग्रेसमधील नेत्यांच्या व्यक्तिगत हितामुळे त्याला विलंब होऊ शकतो, असे सांगत गेराल्ड यांनी खळबळ उडवून दिली आहे. त्यामुळे आता तमिळनाडूत टीव्हीके आणि काँग्रेस आघाडीच्या चर्चांना वेग आला आहे.
सध्यातरी काँग्रेसची द्रमुकसोबतच चर्चा सुरू आहे. मागील अनेक वर्षांपासून त्यांची आघाडी आहे. इंडिया आघाडीमध्ये द्रमुककडून सातत्याने काँग्रेसची पाठराखण करण्यात आली आहे. त्यामुळे काँग्रेस मुख्यमंत्री एम. के. स्टॅलिन यांचा विश्वासघात करून टीव्हीकेसोबत जाणार का, याबाबतच्या चर्चांना उधाण आले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.