Tej Pratap Yadav News : लालू झोपेत असतानाच थोरल्या लेकाचा पहिला ‘पॉलिटिकल स्ट्राईक’

Bihar Politics : बिहारचे माजी मुख्यमंत्री व राष्ट्रीय जनता दलाचे प्रमुख लालूप्रसाद यादव यांनी थोरल्या लेकाची म्हणजे तेजप्रताप यादव यांची पक्षातून हकालपट्टी केली आहे. त्यामुळे बिहारच्या राजकारणात मोठे वादळ उठले आहे. या घडामोडींवर तेजप्रताप यादव यांनी रविवारी पहाटे सोशल मीडियात भावनिक पोस्ट करत पहिल्यांदाच मोठं विधान केले आहे. त्यांच्या या पोस्टमुळे चर्चांना उधाण आले आहे.

तेजप्रताप यादव यांनी काही दिवसांपूर्वी सोशल मीडियात अनुष्का यादव या तरुणीसोबतच्या रिलेशनशिपबाबत माहिती दिली होती. त्यानंतर काही वेळातच त्यांनी ही पोस्ट डिलिटही केली होती. मात्र, त्यांना लालूंच्या रोषाला सामोरे जावे लागले. लालूंनी त्यांना पक्षातून सहा वर्षांसाठी निलंबित करत कुटुंबातूनही बेदखल केल्याची घोषणा सोशल मीडियातूनच केली होती.

लालूंच्या या निर्णयामुळे बिहारमध्ये राजकारण तापले आहे. तेजप्रताप यादव कोणता राजकीय निर्णय घेणार, याबाबत उत्सुकता वाढली आहे. याबाबत त्यांनी रविवारी पहाटेच सोशल मीडियात एक पोस्ट करत सूचक संकेत दिले आहेत. त्यांनी वडील लालूप्रसाद यादव आणि आई राबडीदेवी यांना उद्देशून ही पोस्ट लिहिली आहे.

काय म्हटले आहे?

तेजप्रताप यांनी पहाटे 5 वाजून 27 मिनिटांनी केलेल्या पोस्टची सुरूवात माझे प्रिय आई-वडील, अशी केली आहे. पुढे ते म्हणतात की, तुम्हा दोघांमध्येच माझे संपूर्ण जग सामावले आहे. देवापेक्षाही तुम्ही आणि तुमचा आदेश माझ्यासाठी मोठा आहे. तुम्ही आहे म्हणूनच माझ्याकडे सगळं काही आहे. मला फक्त तुमचा विश्वास आणि प्रेम हवे आहे, इतर काहीच नको.

पक्षातील जयचंद

पप्पा, तुम्ही नसता तर हा पक्षही नसता आणि माझ्यासोबत राजकारण करणारे काही जयचंदसारखे लालची लोकही नसते, असेही तेजप्रताप यांनी म्हटले आहे. त्यांनी जयचंद असा उल्लेख नेमका कुणाचा केला, यावरून चर्चांना उधाण आले आहे. आपले बंधू तेजस्वी यादव यांच्याबाबत हे विधान केले आहे का, असे प्रश्न उपस्थित केले जाऊ लागले आहे. त्यांचे या विधानामुळे बिहारच्या राजकारणात पुन्हा वादळ निर्माण होण्याची शक्यता आहे. या दोघांमधील राजकीय मतभेद यापूर्वीही उघडपणे समोर आले होते. त्यामुळे तेजप्रताप यांचा हा पोलिटिकल स्ट्राईक तर नाही ना, अशी चर्चा आहे.