विरोधकांना मोठा धक्का! अधिवेशनात आता तेरावा सदस्य निलंबित

नवी दिल्ली : संसदेचे (Parliament) हिवाळी अधिवेशनाची (Winter Session) सुरूवातच वादळी ठरलीे होती. मागील अधिवेशनात गोंधळ घातल्याप्रकरणी राज्यसभेच्या 12 सदस्यांना या अधिवेशन काळासाठी निलंबित करून मोदी सरकारने विरोधकांना मोठा धक्का दिला होता. यामुळे हे 12 खासदार या अधिवेशनाला मुकले आहेत. आता आणखी एका खासदाराला निलंबित करण्यात आले आहे. यामुळे सरकार विरुद्ध विरोधक हा संघर्ष तीव्र झाला आहे.

पावसाळी अधिवेशनाच्या शेवटच्या दिवशी (11 ऑगस्ट) झालेल्या गोंधळप्रकरणी 12 खासदारांना निलंबित करण्यात आले होते. आता तृणमूल काँग्रेसचे (TMC) खासदार डेरेक ओब्रायन यांना निलंबित करण्यात आले आहे. सभागृहात बेशिस्त वर्तन केल्याप्रकरणी त्यांनी निलंबित करण्यात आले आहे. त्यांनी नियमपुस्तिका सभागृहाच्या अधिकाऱ्यांच्या दिशेने भिरकावल्याचा आरोप करण्यात आला आहे. निवडणूक सुधारणा विधेयकावरील चर्चेवेळी ही घटना घडली आहे.

सभागृहात बेशिस्त वर्तनाचे कारण देत 12 खासदारांना चालू अधिवेशनात निलंबन करण्यात आले होते. त्यांना आता अधिवेशन संपेपर्यंत कामकाजात सहभाग घेता येत नाही. या बारा जणांमध्ये शिवेसेनेचे खासदार अनिल देसाई व प्रियांका चतुर्वेदी यांचाही समावेश आहे. तसेच काँग्रेसचे सहा, तृणमूल काँग्रेसचे दोन आणि मार्क्सवादी कम्युनिस्ट पक्ष व भारतीय कम्युनिस्ट पक्षाच्या प्रत्येकी एका खासदाराचा समावेश आहे.

पावसाळी अधिवेशनादरम्यान शेवटच्या दिवशी राज्यसभेत मोठा गदारोळ झाला. राष्ट्रवादी काँग्रेसचे अध्यक्ष शरद पवार यांनी थेट केंद्र सरकारवर आरोप करत बाहेरून सभागृहात 40 हून अधिक जणांना आणल्याचा व महिला खासदारांवर हल्ला केल्याचा आरोप केला होता. राज्यसभेत विमा विधेयक सादर केल्यानंतर त्यावरील चर्चेदरम्यान हा गोंधळ झाला होता. त्यावेळी सभागृहात मार्शल बोलावण्यात आले होते. त्यावरूनही मोठा गदारोळ निर्माण झाला होता. मार्शल आणि खासदारांमध्ये धक्काबुक्की झाली होती. या घटनेनंतर विरोधकांनी सरकारवर जोरदार हल्लाबोल केला होता.

चालू अधिवेशनातील निलंबित सदस्य -

1. प्रियांका चतुर्वेदी (शिवसेना)

2. अनिल देसाई (शिवसेना)

3. अखिलेश प्रसाद सिंग (काँग्रेस)

4. सईद नासीर हुसेन (काँग्रेस)

5. राजमनी पटेल (काँग्रेस)

6. रिपून बोरा (काँग्रेस)

7. छाया वर्मा (काँग्रेस)

8. फुलो देवी नेतम (काँग्रेस)

9. शांता छेत्री (तृणमूल)

10. डोला सेन (तृणमूल)

11. एलामराम करीम (सीपीएम)

12. बिनॉय विश्वम (सीपीआय)

13. डेरेक ओब्रायन (तृणमूल)