Uttar Pradesh news : लोकसभेतील दणक्यानंतर मोदी-शहांची खेळी; योगींच्या राज्यात बदलले नेतृत्व... मातब्बर नेत्याला उतरवलं मैदानात

BJP leadership change Uttar Pradesh : लोकसभा निवडणुकीत भाजपला देशातील सर्वात मोठे राज्य असलेल्या उत्तर प्रदेशातून अपेक्षित जागा मिळाल्या नाहीत. समाजवादी पक्षासमोर भाजप सपशेल फेल ठरले. त्यामुळे केंद्रात पुन्हा स्वबळावर सत्ता मिळविण्याचे मनसुब्यांनाही हादरा बसला. आगामी विधानसभा निवडणुकीच्या पार्श्वभूमीवर हा पराभव भाजपसाठी धक्का होता. पण आता त्यातून सावरत २०२७ मधील निवडणुकीसाठी भाजपने मोठी खेळी खेळली आहे.

उत्तर प्रदेशमध्ये भाजपची सत्ता असून योगी आदित्यनाथ मुख्यमंत्री आहेत. भाजप उमेदवारांच्या प्रचारासाठी ते देशभरात जातात. मात्र, लोकसभा निवडणुकीत त्यांच्याच राज्यात भाजपला धक्का बसला. त्यानंतर राज्यात प्रदेशाध्यक्ष बदलाचे वारे वाहू लागले. भाजपचा गड असलेल्या यूपीत कुणाच्या गळ्यात ही माळ पडणार याबाबत देशभरात उत्सुकता होती. अखेर आज त्यावर शिक्कामोर्तब झाले.

उत्तर प्रदेशात भाजपला नवे प्रदेशाध्यक्ष मिळाले आहेत. केंद्रीय पर्यवेक्षक विनोत तावडे व पीयूष गोयल यांनी आज पंकज चौधरी यांच्या नावाची घोषणा केली. शनिवारी केवळ चौधरी यांनीच उमेदवारी अर्ज दाखल केला होता. त्यामुळे त्यांची निवड निश्चित होती. त्यावर आज शिक्कामोर्तब करण्यात आले.

कोण आहेत पंकज चौधरी?

पंकज चौधरी हे मोदी सरकारमध्ये केंद्रीय वित्त राज्यमंत्री आहेत. ते मुळचे गोरखपूरचे असून महराजगंजचे खासदार आहेत. १९९१ पासून आतापर्यंत ते तब्बल सातवेळा लोकसभा निवडणुकीत विजयी झाले आहेत. मोदी सरकारच्या दुसऱ्या मंत्रिमंडळातही ते राज्यमंत्री होते. चौधरी यांना प्रदेशाध्यक्षपद देण्यात आल्याने एका ज्येष्ठ आणि संघटनात्मक पातळीवर अनुभवी नेत्याला संधी मिळाली आहे.

राज्यात आता मुख्यमंत्र्यांसह भाजपचे प्रदेशाध्यक्षही गोरखपूर म्हणजे पूर्वांचलचे असणार आहेत. यामागे भाजपची रणनीती मानली जात आहे. ते कुर्मी समाजाचे आहेत. मात्र, पूर्वांचलमधील अन्य समाजातही त्यांची चांगली प्रतिमा असल्याचे सांगितले जाते. पूर्वांचलमध्ये विरोधकांना फारशी संधी मिळू नये, यादृष्टीने भाजपने आखणी केल्याचे मानले जाते. त्याचप्रमाणे पंकज चौधरी हे केंद्रातही मंत्री असल्याने भाजपसाठी ती जमेची बाजू ठरणार आहे.