Pooja Khedkar : पूजा खेडकर यांच्यानंतर कोण? अतिरिक्त जिल्हाधिकारी देसाईंची घोडेस्वारी वादात...

Telangana :  वादग्रस्त ट्रेनी IAS पूजा खेडकर यांच्या दिव्यांग प्रमाणपत्राचा वाद ताजा असतानाच इतर काही अधिकाऱ्यांच्या प्रमाणपत्राबाबतही संशय व्यक्त केला जात आहे. यावेळी तेलंगणामध्ये आयएएस अधिकारी असलेले प्रफुल देसाई यांच्यावर आरोप होऊ लागले आहेत. त्यांनीही खोटे प्रमाणपत्र देत आरक्षण मिळवल्याचा दावा केला जात आहे.

प्रफुल देसाई हे वर्ष 2019 मध्ये यूपीएससी परीक्षा उत्तीर्ण झाले आहेत. सध्या त्यांचे घोडेस्वारी, सायकलिंग तसेच इतर साहसी खेळ खेळतानाचे फोटो सोशल मीडियात व्हायरल झाले आहे. पूजा खेडकर यांचे दिव्यांग प्रमाणपत्र खोटे असल्याचा दावा होत असतानाच देसाई यांच्या या फोटोंनी आरोप होऊ लागले आहेत.

तेलंगणातील करीमनगर जिल्ह्यात अतिरिक्त कलेक्टर असलेल्या देसाई यांनी यूपीएससी परीक्षेदरम्यान ऑर्थोपेडिकली दिव्यांग असल्याचे प्रमाणपत्र दिले आहे. पण त्यांच्या फोटोंमुळे दिव्यांग असल्याबाबत संशय व्यक्त केला जात आहे.

देसाई यांनी मात्र सर्व आरोप फेटाळून लावले आहे. एका पायाने आपण अपंग आहे, याचाअर्थ आपण कुठल्याही शारीरिक हालचाली करू शकत नाही, असे नाही. फोटोमध्ये दाखवण्यात आलेल्या गोष्टी प्रशिक्षणाचा एक भाग होत्या. एका पायाला पोलिओमुळे आपण पळू शकत नाही. पण चालू शकतो आणि सायकलिंग करू शकतो, असे देसाई यांनी ‘इंडिया टुडे’शी बोलताना सांगितले.

मी बॅडमिंटन नियमित खेळत नसलो तरी कधी-कधी मित्रांसोबत खेळण्याचा प्रयत्न करतो. एका पायाने पेडल मारून सायकल चालवू शकतो. दुसऱ्या पायाचा आधार घेऊ शकतो. डोंगरांवर ट्रेंकिंग हा आमच्या प्रशिक्षण कार्यक्रमाचा भाग होता, असे देसाई यांनी म्हटले आहे.

दरम्यान, देसाई हे मुळचे कर्नाटकातील बेळगाव जिल्ह्यातील एका शेतकरी कुटुंबातील आहेत. पाच वर्षांचे असतानाच त्यांच्या उजव्या पायाला पोलिओ झाला होता. आयएएस होण्यापुर्वी हेत कर्नाटक सिंचन विभागात सहायक अभियंता होते. त्यांनी पहिल्यांदा 2017 मध्ये यूपीएससीची परीक्षा दिली. 2019 मध्ये तिसऱ्या प्रयत्नात त्यांना यश मिळाले आहे.