Lucknow Fire: उत्तर प्रदेशमध्ये भीषण आग! कोचिंग क्लासमधील 15 विद्यार्थ्यांचा होरपळून मृत्यू

Uttar Pradesh fire incident: उत्तर प्रदेशमध्ये लागलेल्या आगीत कोचिंग क्लासमधील 15 विद्यार्थ्यांचा होरपळून मृत्यू झाल्याची धक्कादायक घटना घडली आहे. लखनौ येथील अलींगज परिसरात पुरानिया येथील तीन मजली इमारतीत लागलेल्या या आगीत १५ विद्यार्थ्यांना आपला जीव गमवावा लागला. यात चार जण गंभीर जखमी झाले आहेत.

या घटनेमुळे संपूर्ण परिसरात हळहळ व्यक्त केली जात आहे. राज्याच्या प्रशासनाने तातडीने चौकशी सुरू केली आहे. या घटनेनंतर इमारतींमधील अग्निसुरक्षा व्यवस्थेचा मुद्दा पुन्हा एकदा चर्चेत आला असून नागरिकांमध्ये संतापाचे वातावरण आहे.

या इमारतीच्या दुसऱ्या मजल्यावर कोचिंग क्लास आणि वाचनालय सुरू होते. तळमजल्यावर पाळीव प्राण्यांचे दुकान, तर वरच्या मजल्यावर गेमिंग झोन असल्याचे सांगितले जात आहे. सोमवारी अचानक इमारतीत आग लागल्यानंतर काही मिनिटांतच धूर आणि ज्वाळांनी संपूर्ण इमारत वेढली गेलीस आग पसरल्याने आत अडकलेल्या विद्यार्थ्यांमध्ये एकच गोंधळ उडाला.

प्रत्यक्षदर्शींच्या मते, आग अतिशय वेगाने पसरल्याने अनेकांना बाहेर पडण्याची संधी मिळाली नाही. काही विद्यार्थ्यांनी जीव वाचवण्यासाठी बाल्कनी आणि छताचा आधार घेतला. घटनेची माहिती मिळताच अग्निशमन दलाच्या गाड्या आणि बचाव पथके घटनास्थळी दाखल झाली. मोठ्या प्रयत्नांनंतर अनेकांना सुरक्षित बाहेर काढण्यात आले. मात्र, दाट धुरामुळे काही विद्यार्थ्यांचा गुदमरून मृत्यू झाल्याची माहिती समोर आली आहे.

जखमींना तातडीने केजीएमसी ट्रॉमा सेंटरमध्ये उपचारासाठी दाखल करण्यात आले आहे. प्रशासनाने बचावकार्य पूर्ण झाल्याचे सांगितले असून दुर्घटनेचे नेमके कारण शोधण्याचे काम सुरू आहे.

दरम्यान, मुख्यमंत्री योगी आदित्यनाथ यांनी या घटनेची गंभीर दखल घेतली आहे. सर्व नियोजित कार्यक्रम रद्द केले आहेत. वरिष्ठ अधिकाऱ्यांना घटनास्थळी पाठवून सखोल चौकशीचे आदेश दिले आहेत. दोषींवर कठोर कारवाई केली जाईल, असेही त्यांनी स्पष्ट केले.

याशिवाय पंतप्रधान नरेंद्र मोदी यांनीही यांनीही या दुर्घटनेबद्दल शोक व्यक्त केला आहे. मृतांच्या कुटुंबीयांना प्रत्येकी दोन लाख रुपये, तर जखमींना ५० हजार रुपयांची आर्थिक मदत जाहीर करण्यात आली आहे.

प्राथमिक चौकशीत धक्कादायक माहिती समोर आली आहे. संबंधित इमारत मूळतः निवासी वापरासाठी मंजूर करण्यात आली होती. मात्र, त्याच इमारतीत नियमांना बगल देत कोचिंग सेंटर सुरू करण्यात आल्याचे उघड झाले आहे.

दुर्घटनाग्रस्त इमारतीचा नकाशा निवासी इमारत म्हणून मंजूर झाला होता. तरीही त्या ठिकाणी कोचिंग क्लास सुरू ठेवण्यात आला. यामुळे अग्निसुरक्षा आणि इतर आवश्यक परवानग्यांबाबत गंभीर प्रश्न उपस्थित झाले आहेत. या प्रकाराकडे संबंधित विभागातील अधिकाऱ्यांनी दुर्लक्ष केल्याचा आरोप होत असून, त्याची किंमत निष्पाप विद्यार्थ्यांना जीव गमावून चुकवावी लागल्याची संतप्त प्रतिक्रिया नागरिकांकडून व्यक्त केली जात आहे.