Aditya Thackeray : आदित्य ठाकरेंचा अमित शाह, शिंदे भेटीनंतर खोचक टोला; म्हणाले.'काही लोक...'

Mumbai News : शिवसेनेत उभी फुट पडल्यापासून उद्धव ठाकरे गट व एकनाथ शिंदे यांच्या शिवसेनेत आडवा विस्तवही जात नाहीत. दोघेही एकमेकावर आरोप करण्याची संधी सोडत नाहीत. त्यातच महायुती सरकारमध्ये नाराजीनाट्य असल्याचे समोर आले आहे. त्यामुळेच गेल्या तीन दिवसापासून केंद्रीय गृहमंत्री अमित शाह राज्याच्या दौऱ्यावर आहेत.

यावेळी उपमुख्यमंत्री एकनाथ शिंदे व उपमुख्यमंत्री अजित पवार यांनी भेट घेत नाराजी व्यक्त केली आहे. त्यातच यावरून शिवसेना ठाकरे गटाचे नेते आदित्य ठाकरे यांच्याकडे या दोन्ही गटाच्या नेत्याच्या भेटीबाबत विचारणा केली असता त्यांनी राज्यातील महायुती सरकारवर हल्लाबोल केला.

मुंबईतील पाणी प्रश्नावर रविवारी शिवसेना (Shivsena) ठाकरे गटाची बैठक झाली. या बैठकीनंतर ते प्रसारमाध्यमांशी संवाद साधताना बोलत होते. केंद्रीय गृहमंत्री अमित शाह आणि उपमुख्यमंत्री एकनाथ शिंदे यांच्या भेटीवर प्रतिक्रिया देताना देखील त्यांनी शिंदे यांचे नाव न घेता खोचक टोला लगावला. ‘काल पौर्णिमा होती, काल काही लोक गावी पण जाऊन आले असतील, आणि मग ते ज्यांना भेटले त्यांनी थोडी काळजी घ्यावी, आमच्या अनुभवावरून सांगतो. बाकी काही नाही.’ असेही आदित्य ठाकरे म्हणाले.

केंद्रीय गृहमंत्री अमित शाह (Amit Shah) मुंबईमध्ये आल्यानंतर त्यांची भेट एकनाथ शिंदेंनी घेतली. मात्र त्यांनी अमित शाहांकडे नाराजी व्यक्त केली. अर्थ खाते आमच्या फाईलवर सही करत नाही, अशी तक्रार त्यांनी शाह यांच्याकडे केली, तसेच रायगडच्या पालकमंत्रिपदाचा मुद्दा देखील त्यांनी या भेटीवेळी उपस्थित केला अशी माहिती समोर येत आहे.

आदित्य ठाकरे म्हणाले, शिवसेनेतील सर्वांची बैठक आज पार पडली. एकंदर आपण पाहात आहात गेल्या सहा-सात महिन्यांपासून मुंबईतील पाण्याच्या प्रश्नाबद्दल अनेकदा विषय घेतलेला आहे, मग कुठं गढूळ पाणी असेल, कुठं पाण्याचा दाब कमी असेल. आणि आता उन्हाळ्यात टँकर असोसियशनने संप पुकारला आहे. आता मुद्दा हा आहे की संपापूर्वी टँकर असोसियशनने नोटीस देऊन सुद्धा सरकार काही हलत नसल्याचा आरोप त्यांनी केला आहे.

(२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप)