Ajit Pawar : 'छावा'च्या प्रदेशाध्याला मारहाणीवर अजित पवारांची पहिली प्रतिक्रिया, सूरज चव्हाणचे नावही घेतले नाही!

Ajit Pawar News: लातूरमध्ये ‘छावा’ संघटनेचे प्रदेशाध्यक्ष विजयकुमार घाडगे-पाटील यांना राष्ट्रवादी काँग्रेस युवकचे युवक प्रदेशाध्यक्ष सूरज चव्हाण यांनी त्यांना बेदम मारहाण केली. या मारहाणीचा व्हिडिओ व्हायरल झाला आहे. सुनील तटकरे यांना कृषिमंत्री माणिकराव कोकाटे यांच्या विरोधात निवेदन देत घाडगे-पाटील यांनी तटकरेंच्यासमोर पत्ते टाकले होते.

सूरज चव्हाण आणि राष्ट्रवादीच्या कार्यकर्त्यांनी विजयकुमार घाडगे-पाटील यांना बेदम मारहाण केल्याने चव्हाण यांना अटक करण्याची मागणी होत आहे. आता उपमुख्यमंत्री अजित पवार यांनी या प्रकारावर प्रतिक्रिया दिली आहे. सोशल मीडियावर पोस्ट करत अजित पवारांनी या घटनेचा निषेध केला आहे. विशेष म्हणजे ज्या सूरज चव्हाणने ही मारहाणी केली त्याचा उल्लेख त्यांनी आपल्या पोस्टमध्ये केला नाही.

अजित पवार म्हणाले आहेत की, 'लातूरमध्ये राष्ट्रवादी काँग्रेस आणि छावा संघटनेच्या पदाधिकाऱ्यांमध्ये घडलेली घटना अत्यंत गंभीर, दुर्दैवी आणि निषेधार्ह आहे. कोणत्याही प्रकारच्या हिंसेला, असभ्य वर्तनाला किंवा असंसदीय भाषेला मी ठामपणे विरोध करतो. समाजातील प्रत्येक घटकाच्या न्याय्य मागण्यांचा आणि भावनांचा आम्ही मनापासून सन्मान करतो. '

'राष्ट्रवादी काँग्रेस पक्षाची ओळख ही छत्रपती शिवाजी महाराज, शाहू महाराज, महात्मा फुले आणि डॉ. बाबासाहेब आंबेडकर यांच्या लोकशाही, समता व बंधुत्वाच्या विचारांवरच उभी आहे. माझ्या सर्व सहकाऱ्यांना आणि कार्यकर्त्यांना मी स्पष्टपणे सांगू इच्छितो, सामाजिक जीवनात काम करत असताना नेहमी लोकशाही, शांतता आणि अहिंसा या मुल्यांना प्राधान्य द्या.', असा सल्ला देखील अजित पवार यांनी दिला आहे.