Rahuri By-Election : मोठी बातमी! राहुरी पोटनिवडणुकीत भाजपकडून उमेदवारी जाहीर! अक्षय कर्डिले मैदानात!

Rahuri by-election candidate announcement BJP: आमदार शिवाजी कर्डिले यांचे निधन झाल्याने निवडणूक आयोगाने राहुरी विधानसभा मतदारसंघात पोटनिवडणूक जाहीर केली आहे. 23 एप्रिलला या निवडणुकीसाठी मतदान होणार आहे.

दरम्यान, भाजपने राहुरी पोटनिवडणुकीसाठी शिवाजी कर्डिले यांचे पुत्र अक्षय कर्डिले यांना उमेदवारी जाहीर केली आहे. अक्षय कर्डिलेंच्या उमेदवारीमुळे चर्चांना पूर्णविराम मिळाला असून विरोधी पक्ष आता काय भूमिका घेणार याकडे सर्वांचे लक्ष लागले आहे.

शरद पवारांच्या राष्ट्रवादीमधील माजी आमदार प्राजक्त तनपुरे हे निवडणूक लढण्यास इच्छुक होते. भाजपमध्ये जात ते उमेदवारी मिळवतील अशी चर्चा देखील होती. मात्र, भाजपने अक्षय कर्डिले यांना उमेदवारी देत सर्व चर्चांना पूर्णविराम दिला.

शिवाजी कर्डिले यांच्या घरात उमेदवारी दिल्याने ही निवडणूक बिनविरोध होण्याची शक्यता वर्तवली जात आहे. दरम्यान, शरद पवारांचा राष्ट्रवादी या निवडणूकीबाबत काय निर्णय घेणार यावर विरोधी पक्षांची भूमिका अवलंबून असल्याचे सांगितले जात आहे.

राहुरीसोबत बारामतीमध्ये देखील पोटनिवडणूक होत आहे. राष्ट्रवादी काँग्रेसकडून उपमुख्यमंत्री सुनेत्रा पवार या येथे निवडणूक लढणार आहेत. अजित पवारांच्या अपघाती निधनाने येथे पोटनिवडणूक होत आहे. दरम्यान, येथे देखील बिनविरोध निवडणूक करण्यासाठी सत्ताधारी पक्षाकडून आवाहन करण्यात आले आहे. शरद पवारांच्या राष्ट्रवादीकडून ते उमेदवार देणार नसल्याचे जाहीर केले आहे.

निवडणूक कार्यक्रम

निवडणूक आयोगाने पोटनिवडणुकीसाठी जाहीर केलेल्या कार्यक्रमानुसार पोटनिवडणुकीसाठी उमेदवारी अर्ज दाखल करण्यास सुरुवात झाली आहे. 23 एप्रिलला मतदान पार पडणार आहे. तर, चार मे रोजी मतमोजणी होणार असून निकाल जाहीर केला जाणार आहे. दरम्यान, बारामती आणि राहुरीमध्ये निवडणूक बिनविरोध करण्यासाठी सत्ताधारी पक्षाकडून हलचाली करण्यात येत आहेत.