Bala Nandgaonkar :'दोन ठाकरे एकत्र आले तर 11 होतात...', बाळा नांदगावकर यांची राज-उद्धव ठाकरे भेटीवर मोठी प्रतिक्रिया

Bala Nandgaonkar News : उद्धव ठाकरे यांच्या वाढदिवसा निमित्त रविवारी राज ठाकरे यांनी 'मातोश्री'वर जात उद्धव यांना वाढदिवसाच्या शुभेच्छा दिल्या. राज ठाकरे हे शुभेच्छा देण्यासाठी मातोश्रीवर येताच शिवैसैनिका आणि मनसे सैनिकांनी एकच जल्लोष केला. राज यांच्यासोबत यावेळी बाळा नांदगावकर, नितीन सरदेसाई देखील होते.

ठाकरे बंधूच्या भेटीनंतर बाळा नांदगावकर यांनी फेसबूकवर पोस्ट करत म्हटले आहे की, 'दोन पक्ष एकत्र येऊन लढतात तेव्हा त्यांची ताकद 1+1=2 अशी होते. पण जेव्हा 2 ठाकरे एकत्र येतात तेव्हा हीच ताकद 1+1=11 होते.'

'उद्धवसाहेंबाना सगळ्यात मोठे आपुलकीचे गिफ्ट हे आज राजसाहेबांनी दिले.बाळासाहेब हा सुवर्णक्षण बघायला आज खरच आपण हवे होता. आपला मातोश्री बंगला आज दोन्ही बंधूंना एकत्र बघून नक्कीच आनंदी झाला आहे.', असे देखील नांदगावकर यांनी म्हटले. वाढदिवसानिमित राजसाहेब यांनी मातोश्रीवर जाऊन शुभेच्छा दिल्या. यावेळी बाळासाहेबांच्या वास्तव्याने आमच्यासाठी पवित्र झालेले मातोश्रीत जाऊन माझ्या ही जुन्या आठवणींना उजाळा मिळाला, असे देखील नांदगावकर यांनी म्हटले आहे.

उद्धव ठाकरेंचा पक्षप्रमुख म्हणून उल्लेख

राज ठाकरेंनी उद्धव ठाकरेंच्या भेटीनंतर या भेटीविषयी आपल्या ट्विटरवरून माहिती दिली. त्यामध्ये आमचे मोठे बंधू, शिवसेना पक्षप्रमुख म्हणून उद्धव ठाकरे यांचा उल्लेख केला आहे. शिवसेना हा पक्ष एकनाथ शिंदे यांच्याकडे आहे. तर, उद्धव ठाकरेंच्या पक्षाचे नाव शिवसेना उद्धव बाळासाहेब ठाकरे आहे. मात्र, उद्धव ठाकरेंचा शिवसेना प्रमुख म्हणून उल्लेख करत राज यांनी शिंदेना टोला लगावल्याचे मानले जात आहे.

राज सहा वर्षानंतर 'मातोश्री'वर

राज ठाकरे हे तब्बल सहा वर्षानंतर मातोश्रीवर गेले. तर मनसे स्थापन केल्यापासून वाढदिवसाच्या उद्धव ठाकरेंना शुभेच्छा देण्यासाठी पहिल्यांदाच गेल्याचे सांगितले जाते. अमित ठाकरे यांच्या लग्नाची पत्रिका घेऊन राज ठाकरे मातोश्रीवर गेले होते. तर त्यापूर्वी बाळासाहेबांचे निधन झाले त्यावेळी ते मातोश्रीवर गेले होते.