Baramati By-Election : बारामतीमध्ये पोटनिवडणूक, सुप्रिया सुळेंची मोठी घोषणा, 'सुनेत्रावहिंनीच्या विरोधात...'

Supriya Sule : निवडणूक आयोगाने उपमुख्यमंत्री अजित पवारांच्या निधनाने रिक्त झालेल्या बारामती विधानसभा मतदारसंघात पोटनिवडणूक जाहीर केली आहे. निवडणूक कार्यक्रमानुसार 23 एप्रिलाल मतदान होणार आहे. ही निवडणूक बिनविरोध करण्याचे आवाहन महायुतीमधील नेते करत आहेत. त्यातच खासदार सुप्रिया सुळे यांनी या पोटनिवडणुकीविषयी मोठी घोषणा केली आहे.

'सुनेत्रावहिंनीच्या विरोधात उमेदवार देणार नाही. महाविकास आघाडी बारामतीची सीट लढणार नाही. प्रश्नच नाही.', खासदार सुप्रिया सुळे यांनी राष्ट्रवादी काँग्रेस शरदचंद्र पवार पक्षाचा उमेदवार निवडणुकीच्या मैदानात नसल्याचे स्पष्ट केले आहे. तसेच महाविकास आघाडीची देखील बारामती पोटनिवडणूकीत उमेदवार देण्याची मानसिकता नसल्याचे देखील त्यांनी सांगितले.

बारामतीमध्ये महाविकास आघाडी आपला उमेदवार देणार नाही. त्यामुळे ही निवडणूक बिनविरोध होण्याच्या दृष्टिने पहिले पाऊल पडल्याची चर्चा आहे. दरम्यान, निवडणूक जाहीर झाल्यानंतर आमदार रोहित पवार यांनी सोशल मीडियावर भावूक प्रतिक्रिया दिली.

रोहित पवार भावूक

ते म्हणाले, 'ज्या निवडणुकीत फक्त मताधिक्याचीच चर्चा व्हायची त्या बारामती मतदारसंघात कधी पोटनिवडणूक घ्यावी लागेल, असं कुणाला स्वप्नातही कधी वाटलं नाही.. पण दुर्दैवाने अजितदादा आपल्यातून गेले आणि आज बारामती विधानसभा मतदारसंघासाठी पोटनिवडणूक जाहीर झाली.. कधी कधी वास्तव हे कल्पनेपेक्षाही अधिक भयंकर असतं..!'