Ladki Bahin Yojana : लाडक्या बहिणींना डिसेंबरचे पैसे कधी मिळणार? फडणवीसांनी दिली खूशखबर

लाडकी बहीण योजनेचा डिसेंबर महिन्याचा हप्ता अद्यापही बँक खात्यात जमा झालेला नाहीये. त्यामुळे हा हप्ता कधी मिळणार, असा प्रश्न लाडक्या बहिणींच्या मनात उपस्थित होत होता. त्यातच लाडकी बहीण योजनेचे निकष बदल्यात येतील अशा चर्चाही होत होत्या. निवडणुकांच्या आचारसंहितेमुळे लाडकी बहीण योजनेचा शेवटचा हप्ता ऑक्टोबर महिन्यात बँक खात्यात जमा झाला.

या योजनेचे आधीचे सर्व हप्ते महिलांच्या खात्यावर जमा झाले आहेत. विधानसभा निवडणूक पार पडल्यानंतर आतापर्यंत एकही हप्ता महिलांना मिळालेला नाही. त्यामुळे डिसेंबर महिन्याचा या योजनेचा हप्ता कधी मिळणार याबद्दल प्रश्न उपस्थित होत होते. मात्र आता लाडकी बहीण योजनेचा डिसेंबर महिन्याचा हप्ता कधी मिळणार या प्रश्नाला पूर्णविराम मिळाला आहे.

महायुती सरकारच्या स्थापनेनंतर मुख्यमंत्री देवेंद्र फडणवीस (Devendra fadnavis) यांनी काल पहिल्यांदाच विधानसभेत भाषण केले. या भाषणादरम्यान त्यांनी राज्यातील अनेक मुद्द्यांवर आपली भूमिका मांडली. त्यातच त्यांनी सरकारच्या लाडकी बहीण योजनेबाबत उपस्थित केल्या जाणाऱ्या शंका दूर केल्या आहेत. 'राज्यातील एकही योजना बंद पडू देणार नाही असंही त्यांनी म्हटलं आहे.'

ज्या लाडक्या बहि‍णींनी महायुतीवर प्रेम दाखवलं त्यांना या योजनेचा फायदा होणारचं. त्यामुळे हे अधिवेशन संपताच डिसेंबर महिन्याचा हप्ता आम्ही जमा करणार आहोत, अशी घोषणा यावेळी केली. नवीन कोणतेही बदल आणि निकष न लावता ही योजना आम्ही सुरू ठेवणार आहोत, अशी माहितीही त्यांनी यावेळी दिली. नुकत्याच झालेल्या विधानसभा निवडणुकीत महायुतीच्या यशाला लाडक्या बहि‍णींचे मोठे श्रेय असल्याचे मानलं जात आहे.

दरम्यान, हिवाळी अधिवेशनाच्या पहिल्या दिवशी विधानसभेत 35 हजार 788 कोटी रुपयांच्या पुरवण्या मागण्या मांडण्यात आल्या. यामध्ये लाडकी बहीण योजनेसाठी सरकारकडून 1400 कोटी रुपयांची पुरवणी मागणी सादर करण्यात आली.

तर मुंबई मेट्रो 3 साठी 655 कोटींची अतिरिक्त तरतूद करण्यात आली आहे. राजकोटवरच्या शिवरायांच्या पुतळ्यासाठी राज्य सरकारकडून 36 कोटी रुपये देण्यात येणार आहेत. राज्याचे मंत्री उदय सामंत (Uday Samant) यांनी विधानसभेत पुरवणी मागणी मांडली.