Devendra Fadnavis : मोठी बातमी : भाजपचं ठरलं, देवेंद्र फडणवीसांच्या नावावर शिक्कामोर्तब

Mumbai News : महाराष्ट्राचे मुख्यमंत्री कोण होणार, याची अधिकृत घोषणा थोड्याच वेळात होईल. पण त्याआधीच भाजपच्या गोटातून मोठी बातमी समोर आली आहे. भाजपच्या विधिमंडळ गटनेतेपदासाठी माजी मुख्यमंत्री देवेंद्र फडणवीस यांच्या नावावर शिक्कामोर्तब करण्यात आल्याचे समजते. त्यामुळे तेच राज्याचे मुख्यमंत्री असतील.

कोअर कमिटीच्या बैठकीत भाजपचे निरीक्षक निर्मला सीतारमण आणि विजय रुपाणी यांच्या उपस्थितीत ज्येष्ठ नेत्यांनी फडणवीसांच्या नावाचा प्रस्ताव मांडल्याचे समजते. त्यावर बैठकीत शिक्कामोर्तब करण्यात आले आहे. आता आमदारांच्या बैठकीत चंद्रकांत पाटील आणि सुधीर मुनगंटीवार हे फडणवीसांच्या नावाचा प्रस्ताव मांडतील. तर रवींद्र चव्हाण त्याला अनुमोदन देतील. त्यानंतर बहुमताने फडणवीसांचे नाव निश्चित केला जाईल.

कोअर कमिटीच्या बैठकीत फडणवीस यांच्यासह चंद्रशेखर बावनकुळे, विनोद तावडे, चंद्रकांत पाटील, राधाकृष्ण विखे पाटील, पंकडा मुंडे, अशोक चव्हाण, गिरीश महाजन आदी नेतेही उपस्थित होते. या बैठकीत नेत्यांनी फडणवीसांच्या नावाची शिफारस केल्याचे समजते. त्यानंतर आता भाजप आमदारांच्या बैठकीमध्ये त्यावर अंतिम शिक्कामोर्तब होणार आहे. सुरूवातीपासूनच फडणवीस यांच्याच नावाची चर्चा होती.

आमदारांच्या बैठकीतनंतर महायुतीकडून सत्तास्थापनेचा दावा करण्यासाठी राजभवनात राज्यपालांची भेट घेतली जाईल. सत्तास्थापनेचा दावा केल्यानंतर गुरूवारी सायंकाळी आझाद मैदानात शपथविधी होणार आहे. फडणवीस हे मुख्यमंत्रिपदाची तर अजित पवार व एकनाथ शिंदे हे उपमुख्यमंत्रिपदाची शपथ घेऊ शकतो. तसेच इतर काही मंत्र्यांचाही शपथविधी होण्याची शक्यता आहे.

अद्याप अधिकृतपणे मुख्यमंत्री किंवा उपमुख्यमंत्री तसेच संभाव्य मंत्र्यांच्या नावांची घोषणा झालेली नाही. शिंदे हे उपमुख्यमंत्री पद स्वीकारण्यास तयार झाल्याची राजकीय वर्तूळात चर्चा आहे. मात्र, उपमुख्यमंत्रिपदासोबत गृहमंत्रिपदही मिळावे, यासाठी ते आग्रही होते. त्यामुळेसंभाव्य मंत्रिमंडळाबाबत काय निर्णय होणार, यासाठी गुरूवारी दुपारपर्यंत वाट पाहावी लागू शकते.